ယုံကြည်ခြင်း အနဂ္ဂကိုမွှေး
အော်… တချို့အတိတ်ဆိုတာ
ငါ့ခန္ဓာကိုယ်အစိတ်အပိုင်းသာ
ဖြစ်ခဲ့ရင်ကောင်းမှာ
ဖြတ်ထုတ်ပေးချင်လွန်းလို့ပါကွယ် …။
ဒီလိုနဲ့
ဗေဒါရီရဲ့ဗူး ဘယ်သူဖောက်ခဲ့ဖောက်ခဲ့
ဟစ်တလာရဲ့ နှုတ်ခမ်းမွေးလောက်မှ မထင်ရှားတဲ့ …
အတ္တလေး တမျှင်နဲ့ ရင်ခုန်ခဲ့လိုက်တာ …
နာရီစင်ပေါ်က ခိုကတောင် စိတ်ပျက်လက်ပျက် ငြီးပြသွားရဲ့ …။
သုတ်သီးသုတ်ပြာနဲ့
ဖိနပ်ပေါ်မှာ ချော်မလဲအောင် လျှောက်ခဲ့
တွေတွေဝေေ၀နဲ့ နှာသီးဖျားမှာ
ကာဗွန်ဒိုင်အောက်ဆိုက်တွေကိုလည်း အမိအရဖမ်းခဲ့
သန်းမရှိတဲ့ မင်းဆံပင်တွေကြားမှာလည်း
ဖွဖွလေး ပိုက်စိတ်တိုက်ခဲ့
အမှန်တရားနဲ့လည်း ဖွဲနုတွေ စားခဲ့…
ညဈေးတန်း လက်သုတ်ဆိုင်မှာလည်း
အရက်ပုန်း တပန်းကန်လုံး မော့ခဲ့
နာကျင်တတ်တဲ့ ဟောဒီ စွပ်ကျယ်အောက်က
စူပါမင်း… လေလျှော့ထားတဲ့ ရင်ဘုံဟာ
ခါးကြိုးတင်းနေတဲ့ မျောက်တကောင်လိုလည်း ခုန်ခဲ့ ပြီးတော့ တုန်ုခဲ့ …။
ညီမလေးရာ…
မင်းမလာခဲ့ရင် ကောင်းမယ်
ငါ့ဘ၀ကို စဥ့်အိုးရွေးသလို လက်ဆစ်နဲ့ မခေါက်ခဲ့ရင် ကောင်းမယ်
ငါ့ကျိုးကြေမှုတွေကို ကုန်လုဆဲ ကော်တဘူးနဲ့ မပြုပြင်ခဲ့ရင် ကောင်းမယ်
ငါ့မေတ္တာတရားကို ငါးဆယ်သားအလေးနဲ့ မချိန်တွယ်ခဲ့ရင် ကောင်းမယ်
ငါ့အော့အန်မှုတွေကို စာရင်းမပြုစုရင် ကောင်းမယ်
ငါ့ဆံပင်ဖြူ တပင်နှစ်ပင်ကို ငွေမျှင် တွေလို့ ထောပနာမပြုခဲ့ရင် ကောင်းမယ်
ငါတခါမှ မထောင်ခဲ့ဖူးတဲ့ အလံတလက်ကို တိုင်တိုမှာ မလွှင့်ခဲ့ရင် ကောင်းမယ်…
ငါ့ပုတီးကို ခရီးကိုးပတ် မထွက်ခိုင်းခဲ့ရင် ကောင်းမယ်
ငါ့သံချေးတက် ညိုညစ်နေတဲ့ ဘ၀သံတံခါးကို
အကြင်နာတရားနဲ့ မဖွင့်ခဲ့ရင် ကောင်းမယ်…။
ဒါပါပဲ…
ဘ၀ဆိုတာ ရာခိုင်နှုန်းပြည့်မှ
စည်းစိမ်ဆိုတာ အာမခံချက်ရှိမှ
အသက်ဆိုတာ အရှက်ကတ္တီပါအဖုံးလေး ကာလို့
အရှုံးပေးလာရရင်တောင် သိက္ခာလေး ဖင်စီခံလောက်နဲ့
အငွေ့လေး တထောင်းထောင်း ထနိုင်သေးမှ
ရှင်သန်ရကျိုးနပ်ချင်ကြတဲ့ လောကမှာ …
ငါဟာ သူပုန်ပါကွယ် …
အရာရာဟာ မဆီလျော် အဆင်မသင့်မှုတွေနဲ့
ယုံရာကို ရုန်းကန် ကုန်းဆန်ဆန် ကျောက်စရစ်တောမှာ
ပန်းဥယျာဉ်လေးပျိုးချင်မိမှတော့
ထားခဲ့တော့…သွားနှင့်တော့ ဆိုတာကိုပဲ
အရွယ်လွန် နှဲသမားတစ်ယောက်ရဲ့ ဖားခုန်ညင်းပါးစပ်နဲ့
အသွားတခုထဲကို ထပ်တလဲလဲ နရီမပါ စည်းမရှိဘဲ
အပြီးထိ သီဖွဲ့လိုက်ပါ့မယ် …။
ညီမလေးရာ …
အနာဂတ်ဆိုတာ
ယုံကြည်ရာ ဖြစ်နေခဲ့တော့
သံလွင်မြစ်ကြီး မိုးပေါ်ဆွဲတင်ပြီး ဖြုတ်ချရင်တောင်မှ
ငါ့ဟာနဲ့ငါ ရပ်နေပါရစေ ခြွေချလိုက်ပါ …
ယုံကြည်ရာ … မေတ္တာ … သစ္စာထန်းလက်အောက်
နောက်ဆုံးထွက်သက်ထိ ခိုရင်း …
မျက်ရည်မဲ့ သက်ပြင်းနဲ့ …။ ။
ကိုမွှေး
Posts
