Aung Naing Moe’s Facebook Status
ငါတို့မြို့ထဲ
မကောင်းဆိုးရွားတကောင်
လူယောင်ဆောင်ပြီး
တိတ်တဆိတ်ရောက်လာတယ်။
ဘယ်သူမှ မသိလိုက်ခင်
သူနဲ့ ထိတွေ့မိသူမှန်သမျှ
ဇုမ်ဘီဘဝ ကျရောက်ရရှာ။
ဆင်ခြင်ဉာဏ်ကင်း ...
ညှာတာမှုကင်း ...
ဂရုဏာကင်း ...
မေတ္တာလည်းကင်း
သွေးဆာခြင်းသာ သိတဲ့
ဇုမ်ဘီဘဝ
တယောက်ပြီးတယောက်
ကျရောက်ခဲ့ရပေါ့။
ဇုမ်ဘီ ကိုက်တာခံရသူလည်း
ဇုမ်ဘီတွေဖြစ်။
လမ်းမပေါ်မှာ
လမ်းကြားထဲမှာ
မှောင်ရိပ်ထဲမှာ
နေ့ခင်းကြောင်တောင်မှာ
ဇုမ်ဘီတွေ အုပ်စုဖွဲ့လို့
လမ်းသလားနေကြတယ်
လူ့သွေးနံ့ကို ခံရင်း …
သားကောင်ကို လိုက်လံချောင်းမြောင်းရင်း …။
ဇုမ်ဘီ မဖြစ်သေးသူတွေ
ကျီးလန့်စာစား
တုန်လှုပ်ခြောက်ခြား။
ပြူတင်းတံခါးတွေ အလုံပိတ်
အသံတိတ်ဆိတ်။
ဇုမ်ဘီတွေမှာ
ဆိုင်ကယ်ပါတယ်။
ဇုမ်ဘီတွေမှာ
ဓားလှံပါတယ်။
ဇုမ်ဘီတွေမှာ
မီးကွင်းတွေပါတယ်။
ဘုရားစာ ရွတ်လို့လည်း မပြေး။
ဇုမ်ဘီတွေမှာ
သင်္ကန်းပါ ပါသေးတယ်။
မြို့အနှံ့မှာ မီးတွေ ထတောက်နေပြီ။
အဆောက်အဦးတွေ ပြိုပျက်နေပြီ။
အသုံးအဆောင်တွေ လောင်မီးတိုက်ခံနေရပြီ။
လူတွေ ဇဝေဇဝါ ဖြစ်နေကြတယ်။
ဇုမ်ဘီတွေကို
အသေခံ တော်လှန်မလား။
ဇုမ်ဘီ အကိုက်ခံပြီး
ကိုယ်တိုင် ဇုမ်ဘီအဖြစ်ခံလိုက်ရတော့မလား။ ။
ကိုပေါ
Posts
No comments:
Post a Comment