အထည်ဟောင်းကို ဆေးသားအသစ်တင်လို့ ၀တ်ဆင်ကြည့်တဲ့ နအဖ

အောင်ဇေမင်း

ဗုံးပေါက်တယ် … ဗုံးပေါက်တယ် ဆိုပြီး မြန်မာပြည်မှာ ဖြစ်နေတာကြာပါပြီ။ အဲဒီလို ဗုံးပေါက်တိုင်းလည်း “KNU, ABSDF, ပြည်ပအဖွဲ့အစည်းများ၊ အနောက်နိုင်ငံကြီးတစ်နိုင်ငံ …” စသဖြင့် အမည်တွေ အမျိုးမျိုးတပ်ပြီး နအဖက စွပ်စွဲလေ့ ရှိပါတယ်။ အဲဒီလို စွပ်စွဲတိုင်းလည်း ဒီဘက်က အဖွဲ့အစည်း အသီးသီးက ဂုဏ်သိက္ခာရှိရှိနဲ့ ပြန် လည်ဖြေရှင်း တုန့်ပြန်နိုင်တာကို တွေ့ရှိရပါတယ်။ ဒီဘက်အဖွဲ့အစည်းတွေက အဲဒီဗုံးတွေ မဖောက်ခွဲတဲ့ အကြောင်းကိုပါ။ ဒါပေမယ့် ဖြေရှင်းစရာ မလိုတော့လောက်အောင်ကို လယ်ပြင်မှာ ဆင်သွားသလို ထင်ရှားနေတာပါ။

ဒါဟာ ဘယ်သူ့လက်ချက်လဲ …
နအဖရဲ့ လက်ချက်ပါပဲ
နအဖရဲ့ ပိရိသေသပ်တဲ့ ယုတ်မာမှု တခုပါ
နအဖရဲ့ လှပတဲ့ ရက်စက်ရိုင်းစိုင်းမှု တခုပါ
ဒါပေမယ့် ပညာတတ် လူတန်းစားတွေ အပေါ်မှာတော့ နအဖရဲ့ မပီပြင်လှတဲ့ လှည့်စားမှုတခုလို့ ဆိုလိုက်ပါရစေ …။

ဘာ့ကြောင့် ဒီလိုပြောနိုင်တာလဲ။

နအဖဟာ လိုင်စင်ရနေတဲ့ လူသတ်သမားပီပီ သူ့အတွက် နိုင်ငံရေး၊ စစ်ရေး အခက်အခဲတွေ၊ အကြပ်အတည်းတွေနဲ့ ကြုံတွေ့ရတိုင်း ဒီလိုမျိုး ယုတ်မာရိုင်းစိုင်းတဲ့ လှည့်ကွက်တွေနဲ့ ထွက်ပေါက် ရှာလေ့ရှိပါတယ်။ ထင်ထင်ရှားရှား သာဓကတခုအနေနဲ့ ၁၉၉၇ ခုနှစ် မတ်လပိုင်းမှာ မန္တလေးမြို့၌ မဟာမုနိဘုရားကြီး ဆင်းတုတော်ရဲ့ ဌာပနာကို တိုင်းမှူးက ဖောက်ပါတယ်။ အဲဒီမှာပဲ ဗုဒ္ဓဘာသာဝင် ရဟန်းသံဃာတော်တွေနဲ့ ပြည်သူလူထုက သိသွားတော့ ပေါက်ကွဲလုလု အခြေအနေ ရောက်ရှိသွားပါတယ်။ အဲဒီမှာပဲ “မူဆလင်သူဌေး တယောက်က မြန်မာ မိန်းမပျိုလေး တယောက်ကို မုဒိန်းကျင့်သတဲ့ …” ဆိုတဲ့ သတင်းဟာ တောမီးလိုတမြို့လုံး ရောက်ရှိ ပျံ့နှံ့တော့တာပါပဲ။ မူဆလင်သူဌေးဆိုသူက ဘယ်သူမှန်းလည်း မသိ။ ဘယ်နေရာကမှန်းလည်း မသိပါဘူး။ ဒါပေမယ့် ကမ္ဘာပေါ်က လူမျိုးတိုင်းမှာ “အမျိုး၊ ဘာသာ၊ သာသနာ” ဆိုတဲ့ ခံယူချက်က ရှိကြတယ် မဟုတ်လား။ ကျနော်တို့ ဗမာလူမျိုးတွေလည်း ဘာကိုမှ စူးစမ်းမနေတော့ဘဲ မူဆလင်ဗလီတွေကို ဖျက်၊ မူဆလင်အိမ်တွေကို ဖျက်၊ လူတွေကို ရိုက်၊ မူဆလင်တွေကလည်း ဗမာတွေကို ပြန်ရိုက်နဲ့ ငရဲပွက်တော့တာပါပဲ။

အဲဒီဖြစ်စဉ်ရဲ့ အဓိကတရားခံက နအဖ၊ အဲဒီတုန်းက န၀တ လက်ချက်ပါ။ သူတို့ရဲ့ ဘာသာတရားအပေါ်မှာ ကျူးလွန်တဲ့ ဒုစရိုက်ကို လူမျိုးရေး၊ ဘာသာရေး၊ အဓိကရုန်းနဲ့ ဖြေရှင်းလိုက်တာပါ။ အဲဒီတုန်းကတော့ လူတွေက အခုလောက် အသိဥာဏ် မရှိကြသေးချိန်။ “ဘာသာတရား”ကို အလွဲအမှား မှိုင်းတိုက်တဲ့အချိန်မှာ အလွယ်တကူ လောင်မြိုက် သွေးဆူလွယ်တဲ့ သဘာဝက ရှိချိန်ဆိုတော့ နအဖ အစီအစဉ် အောင်မြင်သွားခဲ့ပါတယ်။ တကယ်တော့ မန္တလေး အိုးဘိုထောင်ထဲက အကျဉ်းသား နှစ်ကြီးသမားတွေခေါ်ပြီး ဘုန်းကြီးတွေလို ပုံစံလုပ်ပြီး ဗလီတွေ ဖျက်ခိုင်းခဲ့တာပါ။ ဘာ့ကြောင့် သိသလဲဆိုတော့ မန္တလေးထောင်ထဲမှာ လူရိုက်မှုနဲ့ ထောင်ကျဖူးတဲ့ ကျနော့်မိတ်ဆွေ မူဆလင်တယောက်က ပြောပြခဲ့ဖူးလို့ပါ၊ အဲဒီဖြစ်စဉ်တုန်းက သူဝတ်ပြုတဲ့ ဗလီကို ကာကွယ်ဖို့ရှိနေတုန်း တုတ်တချောင်းနဲ့ ဘုန်းကြီးတပါး တက်လာတာကို တွေ့လိုက်ရပါတယ်။ အဲဒီဘုန်းကြီးကို ကြည့်လိုက်တော့ ထောင်ထဲမှာ ဆုံဖူးတဲ့ လူသတ်မှုနဲ့ ထောင်ကျနေတဲ့ နှစ်ကြီးသမား ထောင်ကျတဦး ဖြစ်နေတာကို သူသိလိုက်ပါတယ်။ ဒါနဲ့ သူလည်း မသင်္ကာဖြစ်ပြီး အဲဒီဘုန်းကြီးကို မိရင် အဖြစ်မှန် ပေါ်မှာပဲဆိုပြီး အပေါ်ကနေ ဆီးရိုက်တာ ကံကောင်းချင်တော့ လွတ်သွားခဲ့ပါတယ်။ ဒါပေမယ့် သူသိလိုက်တာက အဲဒီလူဟာ ဘယ်နည်းနဲ့မှ လွတ်ချိန် မရောက်သေးဘူး ဆိုတာရယ်၊ သူလိုမျိုး ဘုန်းကြီးအတုတွေ အများကြီးလွှတ်ပြီး ဒီလိုအဓိကရုန်းမျိုး ဖြစ်လာအောင် လုပ်တယ်ဆိုတာကိုပါပဲ။ အဲဒီဖြစ်စဉ်တခုလုံးမှာ မန္တလေးမြို့က သံဃာအစစ်တွေ လုံးဝမပါဝင်တဲ့ အကြောင်းလည်း အဲဒီမူဆလင်မိတ်ဆွေက ပြောပြသွားခဲ့ပါတယ်။

စက်တင်ဘာ အရေးတော်ပုံကြီး ဖြစ်ခါစတုန်းကလည်း “မြောက်ဥက္ကလာမှာရှိတဲ့ မူဆလင်ဗလီကို ဘုန်းကြီးတွေ ၀င်ဖျက်နေပြီ …” ဆိုပြီး နအဖက ၀ါဒဖြန့်ချိခဲ့ပါသေးတယ်။ ဒါပေမယ့် အခုအချိန်ဟာ ၁၉၉၇ ခုနှစ် မဟုတ်တော့ဘူးဆိုတာ နအဖ သိသွားခဲ့ပါတယ်။ လူမျိုးပေါင်းစုံ ဘာသာပေါင်းစုံပါဝင်တဲ့ “ရွှေဝါရောင်တော်လှန် ရေးကြီး”ကို ရုပ်ပိုင်းဆိုင်ရာ စော်ကားမှု ရက်စက်မှုတွေနဲ့ ဖြိုခွင်းခဲ့ပေမယ့် စိတ်ပိုင်းဆိုင်ရာမှာတော့ မြန်မာတနိုင်ငံလုံးသာမက တကမ္ဘာလုံးမှာရှိတဲ့ ဘာသာပေါင်းစုံ လူမျိုးပေါင်းစုံဟာ တစည်းတလုံးထဲ ဖြစ်သွားတာကို နအဖ သိရှိသွားခဲ့လိုက်ရပါတယ်။ ဒါ့ကြောင့် နအဖရဲ့ ရိုးအီနေပြီဖြစ်တဲ့ ဖက်ရှင်အဟောင်း လူမျိုးရေး ဘာသာရေး အဓိကရုန်းဆိုတာကို ထပ်မံဆင်ယင်ခွင့် မရခဲ့တော့ပါဘူး၊

ဒါ့ကြောင့်လည်း နောက်တမျိုး လှည့်ကွက်သစ်အနေနဲ့ “KNU, ABSDF, ပြည်ပအဖွဲ့အစည်းများ၊ အနောက်နိုင်ငံကြီးတနိုင်ငံ …” စသဖြင့် ခေါင်းစီးတွေတပ်ပြီး သူကိုယ်တိုင် ဗုံးတွေခွဲပြလိုက်တာပါ။ ဒါပေမယ့် ဒီဖက်ရှင်ကလည်း အသစ်မဟုတ်ပါဘူး။ ၂၀၀၅ ခုနှစ် မေလတုန်းက ရန်ကုန်မြို့ လူစည်ကားတဲ့ နေရာကြီး (၃)ခုမှာ ဗုံးတွေ ခွဲပြခဲ့ဖူးပါတယ်။ ၃ နှစ်အကြာမှာ တခါပြန်ပြီး လုပ်ပြတာ ဖြစ်ပါတယ်။

ဒီလိုခွဲမပြခင်မှာ မြန်မာပြည်တွင်းက ပြည်သူပြည်သားတွေအနေနဲ့ ပြည်ပက လေ့လာသုံးသပ်ချက်တွေ၊ သတင်းတုန့်ပြန်ချက်တွေ မသိရှိနိုင်အောင် ပထမဆုံး ဂြိုဟ်တုစလောင်းတွေ ဖြုတ်ခိုင်းခဲ့ပါတယ်။ အဆမတန် အခွန်အခတွေ ကောက်ခံတာဟာ ဖြုတ်ခိုင်းတာနဲ့ အတူတူပါပဲ။ အင်တာနက် စာမျက်နှာတွေ ကြည့်ခွင့်မရအောင် လုပ်တယ်။ အရာရှိချင်း အဆင့်တူရင်တောင်မှ သူတို့ဖက်ပါတဲ့ အရာရှိစစ်ဗိုလ်တွေကိုမှ အင်တာနက် သုံးတတ်အောင် သုံးနိုင်အောင် ပြုလုပ်ပေးထားတယ်။ ကျန်တဲ့ အဆင့်ဆိုတာကတော့ အင်တာနက်မပြောနဲ့ ရေဒီယိုတောင် မသီနိုင်အောင်လုပ်ထားတယ်။ သတင်းနည်းပညာတွေကို အမှောင်ချထားမှလည်း မြန်ပြည်သူပြည်သားတွေ အမှန်ကို သိခွင့်မရမှာလေ။

သံဃာတော်တွေကို သတ်ရဲ၊ ဘုရားပေါ်တောင် စစ်ဖိနပ်စီးပြီး တက်ရဲတဲ့ နအဖစစ်အာဏာရှင်တွေဟာ နောက်တခါ ပြည်တွင်းပြည်ပက ဒီမိုကရေစီအဖွဲ့သားတွေကို အပြစ်ရှာဖို့အတွက် ဗုံးအကြီးစားတွေ ခွဲမပြဘူးလို့ မဆိုနိုင်တော့ပါဘူး။ သေချာတာကတော့ သူတို့ကိုယ်တိုင်တောင် ကြောက်လွန်းလို့ လုံခြုံရေးတွေ အထူးတင်းကြပ်ထားတဲ့ နအဖစစ်ဖိနပ်အောက်က ပြည်မထဲကို ဗုံးမပြောနဲ့ ဗျောက်တောင် သယ်ရဲကြမှာ မဟုတ်ပါဘူး။ ဘယ်လူမျိုး ဘယ်ဘာသာဝင် ဘယ်နိုင်ငံရေး ဘယ်တော်လှန်ရေး အဖွဲ့အစည်းကမှလည်း ကိုယ့်တိုင်းသူပြည်သား အချင်းချင်းကို နအဖလို မရက်စက် မယုတ်မာကြပါဘူး။ အခုလည်း ကရင်အမျိုးသားတွေကို နှိပ်စက်ဖို့ အကြောင်းပြပြီး အပြစ်မဲ့တဲ့ ကရင်အမျိုးသားတွေကို စတေးနှိပ်စက်ပြီး ၀န်ခံခိုင်းတဲ့ လုပ်ရပ်နဲ့ အရင်လုပ်ခဲ့ဖူးတဲ့ ဗျူဟာအဟောင်းကို ဆေးရောင်ပြန်တင်ကြည့်နေတာပါ၊ ပြည်သူဘက်က တကယ်တမ်း လုပ်ခွင့်ရရင်တောင်မှ အဲဒီလို အောက်တန်းကျတဲ့။ ယုတ်မာတဲ့။ ယောက်ျားမပီသတဲ့။ စစ်သားကောင်းတယောက်ရဲ့ အကျင့်မျိုး မဟုတ်တဲ့ အပြုအမူတွေနဲ့ ဖြေရှင်းကြမှာ မဟုတ်ဘဲ တရားဥပဒေဘောင် အတွင်းကသာ ဖြေရှင်းကြမှာ ဖြစ်ပါတယ်။

အဲဒါကြောင့် ပြည်တွင်းမှာရှိတဲ့ ပြည်သူပြည်သားတွေ အနေနဲ့ နအဖရဲ၌ တိုးမြှင့်ယုတ်မာ ရိုင်းစိုင်းမှုကို အထူးသတိထား နေထိုင်သွားလာကြဖို့ လိုအပ်ကြောင်းနဲ့အတူ အန္တရာယ်အသွယ်သွယ်ကို ရှောင်ရှားနိုင်ကြပါစေကြောင်း ရေးသားဖော်ပြလိုက်ရပါတယ်။

အောင်ဇေမင်း