သိမ်းဆည်းမြေဧက ၅ သိန်းခန့်တွင် ၁ သိန်းကျော်သာ စွန့်လွှတ်မည်

ကို​ထွေး​
DVB - 2 July 2014​

စစ်တပ်နဲ့ ကုမ္ပဏီတွေက နိုင်ငံတ၀န်းမှာ သိမ်းဆည်းထားတဲ့ လယ်ယာမြေဧက ၄ သိန်း ၇ သောင်းကျော်ထဲက ၁ သိန်းကျော်ကိုသာ စွန့်လွှတ်မယ်လို့ ကာကွယ်ရေးဝန်ကြီးဌာနက ပြည်ထောင်စုလွှတ်တော်မှာ တရားဝင် ပြောဆိုပါတယ်။
​
လယ်ယာမြေနဲ့ တခြားမြေများ သိမ်းဆည်းခံရ မှုကြောင့် ပြည်သူလူထုများ နစ်နာမှု မရှိစေရေး စုံစမ်းရေး ကော်မရှင်ရဲ့ အစီရင်ခံစာပါ ကိစ္စရပ်တွေနဲ့ မြေယာ အမှုတွဲတွေအပေါ် အုပ်ချုပ်ရေး အဖွဲ့အစည်းတွေရဲ ဖြေရှင်းဆောင်ရွက်မှု အခြေအနေနဲ့ စပ်လျဉ်းပြီး ဒီနေ့ကျင်းပတဲ့ ပြည်ထောင်စုလွှတ်တော်မှာ ကာကွယ်ရေးဝန်ကြီးဌာန ဒုတိယ၀န်ကြီး ဗိုလ်မှူးချုပ် ကျော်ညွန့်က ရှင်းလင်းခဲ့တာပါ။
​
အမှုပေါင်း ၆၉၉ မှု အတွက် သိမ်ဆည်းမြေဧက ၄၇၃၉၇၉ ဧက ကျော်ရှိနေပြီး ပြန်မစွန်လွှတ်တဲ့ မြေဧက ၃၅၁၇၃၃ဧက ကျော်ရှိနေတဲ့အကြောင်း သူက ရှင်းလင်းခဲ့တယ်လို့ မြေပုံမြို့နယ် ပြည်သူ့လွှတ်တော် ကိုယ်စားလှယ် ဦးဖေသန်းက ပြောပါတယ်။
​
စွန့်လွှတ်သွားမယ့် လယ်ဧက အရေအတွက်ဟာ ၁ သိန်း ၂ သောင်းသာ လျာထာပြီး တချို့တ၀က်သာ သိမ်းဆည်းခံရသူတွေ လက်ဝယ်ကို လွှဲပြောင်းပေးနိုင်ကြောင်းနဲ့ ပြန်လည် လွှဲပြောင်းပေးရာမှာလည်း ပိုင်ရှင်အစစ်မှန်နဲ့ပတ်သက်လို့ ပြဿ နာတွေ၊ ကြန့်ကြာမှုတွေ ရှိနေတဲ့အကြောင်း လွှတ်တော်အမတ်တွေက ဆွေးနွေးခဲ့တယ်လို့ သူက ပြောပါတယ်။
​
စိုက်ပျိုးမွေးမြူရေးအတွက်ဆိုပြီး စစ်တပ်က သိမ်းဆည်းခဲ့တဲ့မြေတွေကိုလည်း လွှတ်တော်ကိုယ်စားလှယ်တွေက ပြန်ပေးစေချင်ကြတယ်လို့ သူက ပြောပါတယ်။
​
အစိုးသစ်လက်ထက်မှာ လယ်ယာမြေပြသနာကို ပြေလည်အောင် မဖြေရှင်းပေးနိုင်သေးဘဲ သိမ်းဆည်းခံလယ်သမားတွေက ထွန်တုံး တိုက်ပွဲဝင်တာ၊ ဆန္ဒပြတာတွေ မြန်မာနိုင်ငံတ၀န်း ကျယ်ကျယ်ပြန့်ပြန် ဖြစ်ပွားနေသလို အုပ်ချုပ်ရေးပိုင်းနဲ့ ကုမ္ပဏီတွေကလည်း လယ်သမားတွေကို ပိုင်နက်ကျူးလွန်မှု၊ အကျုိးးပျက်စီးစေမှုတွေနဲ့ တရားစွဲဆိုနေကြပါတယ်။

ဆက်စပ်သတင်းများ
- ဒီဇင်ဘာလမှာ သိမ်းယူလယ်မြေ ဧက ၁ သိန်း ၂ သောင်းကျော် ပြန်ပေးမည် click
- သိမ်းဆည်းခံ လယ်ယာမြေများအရေး (ရုပ်သံ) click
- သိမ်းဆည်းမြေ ၄ သိန်းကျော်ထဲ မစွန့်လွှတ်နိုင်တဲ့မြေ ၃ သိန်းခွဲကျော်ရှိ (ရုပ်သံ) click
- နေပြည်တော် သိမ်းဆည်းလယ်မြေများ ပြန်ရရေး လွှတ်တော်တွင် တောင်းဆိုမည် click