ရေးဖြစ်ခဲ့သော မြားနတ်မောင် တာဝန်ခံအယ်ဒီတာစကား (၄)လူနှင့် မီဒီယာ
ဒေါက်တာလွဏ်းဆွေ
ယနေ့အချိန်အခါတွင် လူထုနှင့် တိုက်ရိုက်ဆက်သွယ်ရေးလမ်းကြောင်း (Mass Media) များက တနေ့တခြား ဖွံ့ထွားလာနေသည်။ စာနယ်ဇင်းပေါင်းစုံ၊ ရုပ်မြင်သံကြားလိုင်းပေါင်းစုံ၊ အသံလွှင့်ဌာနမျိုးစုံ၊ အင်တာနက်စာ မျက်နှာမျိုးစုံ … စသည်ဖြင့် ဖတ်စရာ မှတ်စရာ ကြည့်ရှုနားဆင်စရာများက အမျိုးမျိုးအဖုံဖုံ စုံလင်စွာ ဖြစ်တည် လာနေသည်။
ထိုသို့ မီဒီယာမျိုးစုံ တည်ရှိလာနေသည့်အထဲမှ နိုင်ငံရေးတလိုင်တည်း ဇောင်းပေးတင်ဆက်နေသော မီဒီယာ က အမျိုးမျိုး၊ စီးပွားရေးတလိုင်းတည်း ဇောင်းပေးတင်ဆက်နေသည့် မီဒီယာက အဖုံဖုံ၊ အားကစားတမျိုး တည်း ဇောင်းပေးတင်ဆက်နေသော မီဒီယာက အစားစား၊ မှုခင်း၊ ဂမ္ဘီရ၊ နည်းပညာ ... စသည်ဖြင့် တမျိုး တည်း၊ တလိုင်းတည်းမှာပင် မီဒီယာအမယ်က စုံလင်လွန်းလှပေသည်။
ဥပမာအားဖြင့် အားကစားဝါသနာပါသူ ပရိသတ်တယောက်အဖို့ ထွက်သမျှ သတင်းစာ၊ ဂျာနယ်၊ ရုပ်မြင်သံ ကြားလိုင်းပေါင်းစုံမှ အားကစားသတင်း အကုန်လုံးကို ဖတ်ချင်၊ ကြည့်ချင်၊ သိချင်နေလျှင် တရက်တာတွင်ရှိ သည့် (၂၄) နာရီနှင့်ပင် လုံလောက်မည်မထင်။ ထို့အတူ နိုင်ငံရေး၊ စီးပွားရေးကို စိတ်ဝင်စားသူများအနေဖြင့် လည်း အလုံးစုံကို သိမီအောင် ဖတ်မှတ် ကြည်ရှုဖို့ အချိန်လုံလောက်မှု ရှိမည်မထင်။
တနည်းဆိုရသော် မျက်မှောက်ခေတ် လူသားများအနေနှင့် ဖတ်မှတ် ကြည့်ရှုနားဆင်စရာ မီဒီယာတွေက တ နေ့တခြား တိုးပွားလာပြီး ကိုယ်ပိုင်အချိန်က ပိုပိုရှားပါးလာသည့် ပြဿနာနှင့် ရင်ဆိုင်လာရခြင်းပင်ဖြစ်သည်။ ရှိသမျှ မီဒီယာပေါင်းစုံကို တနေကုန်ထိုင်၍ ဖတ်မှတ် ကြည့်ရှုနားဆင်နေလျှင် အသက်မွေးဝမ်းကျောင်းမှုအ တွက် အလုပ်လုပ်ရမည့် အချိန်ပင် ရှိတော့မည်မဟုတ်ပေ။
ထို့အတွက် အားလုံးကို လောဘတကြီး သိမီဖို့ မဖြစ်နိုင်တော့ဘဲ မိမိနှင့် သက်ဆိုင်သည့်၊ မိမိနှင့် မိမိနေထိုင်ရာ လူ့အဖွဲ့အစည်းအတွက် အကျိုးစီးပွားဖြစ်ထွန်းစေမည့် အကြောင်းအရာများကိုသာ ရွေးချယ် ဖတ်မှတ် ကြည့်ရှု နားဆင်မှ အကျိုးများမည့် အနေအထားသို့ ရောက်ရှိလာသည်ကို သတိမူဖို့ လိုအပ်ပေသည်။
ဥပမာအားဖြင့် အားကစားလိုင်းကို ဇောင်းပေးတင်ဆက်နေသော ဂျာနယ်အမျိုးမျိုးရှိရာ တစောင်နှင့်တစောင် သတင်းထပ်ခြင်း၊ တင်ပြပုံကွဲသော အကြောင်းအရာတူများ ပါရှိခြင်းများ ရှိပါသည်။ ထိုသို့ ရှိနေသည့်အပြင် ရှိ သမျှ အားကစားဂျာနယ်ပေါင်းစုံကို ဖတ်ရှုရန်အတွက်လည်း အချိန်မရှိဖြစ်ရကား သတင်းအစုံဆုံးနှင့် တင်ပြပုံ အကောင်းဆုံး အားကစားဂျာနယ်ကိုသာ ရွေးချယ်ဖတ်ရှုပါက အချိန်ရော ငွေပါ အကုန်သက်သာပြီး ထိရောက် မှုအရှိဆုံးဖြစ်မည်ဟု ထင်မိပါသည်။
ပရိသတ်ဘက်မှ ထိုသို့ ရွေးချယ်လာနိုင်သည့်အလျောက် မီဒီယာများဘက်မှလည်း မိမိတို့မီဒီယာအား ပရိ သတ်အများစု ရွေးချယ်စေရန် ပို၍ လုံ့လ၀ီရိယစိုက်ထုတ် တင်ဆက်ကြရမည့် အနေအထားသို့ ဆိုက်ရောက် လာသည်ကို သတိပြုမိဖို့ လိုပေသည်။ မီဒီယာများအနေနှင့် အားထုတ်မှု နည်းနည်းလျော့လျှင် နည်းနည်းကျ ဆင်းမည်ဖြစ်ပြီး များများလျော့လျှင် များများဆုံးရှုံးမှုရှိလာမည်မှာ မုချပင်ဖြစ်သည်။
အချုပ်အားဖြင့်ဆိုရသော် ယနေ့အချိန်အခါတွင် လူ၊ အလုပ်၊ ၀ါသနာ၊ အချိန်နှင့် ၀င်ငွေကို အချိုးကျကျ ပေါင်း စပ်နေထိုင်နိုင်ပါမှ တဦးချင်းစီ၏ တိုးတက်မှုနှုန်းထား မြင့်မားလာနိုင်မည် ဖြစ်သကဲ့သို့ မီဒီယာများအနေနှင့် လည်း စဉ်ဆက်မပြတ် ပို၍ပို၍ အားထုတ်တင်ဆက်နိုင်မှသာလျှင် ရေရှည်ရပ်တည်နိုင်မည့် အနေအထားကို ရရှိပိုင်ဆိုင်နိုင်မည်ဟု ထင်မြင်မိကြောင်း ရေးသားတင်ပြလိုက်ရပေသည်။
(မြားနတ်မောင်မင်္ဂလာမဂ္ဂဇင်း၊ ဇန်န၀ါရီလ၊ ၂၀၀၂ ခုနှစ်)
Posts
No comments:
Post a Comment