ဟိုတယ် (ကဗျာ)

ဟိုတယ်
မောင်ချောနွယ်

လတ်လတ်ဆတ်ဆတ် ကိုက်ဖဲ့ပြီးစ
ဖရဲသီးအ၀ါလို
‘လ’နှယ်
အချိုရည်တွေ တစက်စက်ရွှဲကျ
အစေ့တွေကတော့ အဖြူစကြယ်တွေ
ဗရပွကြဲ
ပိုးသားအိအိ တိမ်တိုက်တွေ
စိတ်လေလွင့်ကြ
ဆင်ခြင်တုံငှက်တွေ
ငါ့ခန္ဓာထဲက ပျံထွက်ကုန်ကြ
သူတို့တောင်ပံရိုက်ခတ်သံတွေဟာ
မြွေတွန်သံတွေ ဖြစ်သွားကြပြီး
နိုက်ကလပ်တစ်ခုမှာ
စိတ်လွတ်ကိုယ်လွတ် မူးယစ်ကခုန်နေသူတွေလို
ကခုန်နေကြ
ဘ၀ကို
အင်္ကျီချွတ်သလို ချွတ်ချလို့မရတဲ့ည
ဘ၀ကို
ခြေအိတ်စွပ်သလို စွပ်ချလို့မရတဲ့ည
ညကညကို ပြန်မျိုလို့မရတဲ့ည
ဘယ်လိုမှ ရေရောသောက်လို့မရတဲ့ည
အဲဒီညတွေဟာ
ဟိုတယ်ထဲ ခုန်ပေါက်ဝင်သွားတဲ့အခါ
ဟိုတယ်တွေက လက်လွတ်ထွက်ပြေးလာ
ညတွေဟာ
ဟိုတယ်ဖြစ်ခဲ့တယ်။ ။

မောင်ချောနွယ်