ပြည်တွင်းပြည်ပ တိုက်ပွဲဝင်များသို့ ၂၀၀၈-လုပ်ငန်းစဉ် (၃)ခု အကြံပြုချက်

ဒေါက်တာလွဏ်းဆွေ

ရွှေဝါရောင်အရေးတော်ပုံ မတိုင်မီလေးနှင့် အရေးတော်ပုံအပြီးတွင် အထင်ကရ ဒီမိုကရေစီရေး လှုပ်ရှားသူ အတော်များများ အဖမ်းခံလိုက်ရသည်။ အဓိကအားဖြင့် မြန်မာပြည်သူတွေ အားကိုးအားထား ပြုလာသည့် ၈၈-မျိုးဆက် ကျောင်းသားခေါင်းဆောင်တွေ အားလုံးနီးပါး အဖမ်းခံရသည်။ ရှေ့မှာလည်း လူထုခေါင်းဆောင် ဒေါ်အောင်ဆန်းစုကြည်နှင့် ဗိုလ်ချုပ်ကြီးဟောင်း တင်ဦးတို့က နေအိမ်အကျယ်ချုပ်၊ ဆရာကြီး ဦးဝင်းတင်က ထောင်ထဲမှာ နှစ်ရှည်လများ အထိန်းသိမ်းခံနေရသည်။ သို့ဖြစ်၍ လက်ရှိအခြေအနေတွင် ပြည်တွင်း၌ တိုက်ပွဲကို ဆက်လက် ဦးစီးဦးဆောင်ပြုနိုင်မည့် (လူထုက အမှန်တကယ် အားကိုးသည့်) အထင်ကရ ခေါင်းဆောင်တွေ မရှိတော့သကဲ့သို့ ဖြစ်သွားသည်။ ဒီမိုကရေစီရေး တက်ကြွလှုပ်ရှားသူများ အကြားတွင် ခေါင်းဆောင်မဲ့နေသလို ခံစားနေရသည့် အသံဗလံများ ဟိုမှသည်မှ ထွက်ပေါ်လာသည်။

တပ်ပေါင်းစုဖွဲ့ပြီး အားလုံးကို ဦးဆောင်နိုင်မည့် ခေါင်းဆောင်သစ်တဦး ပေါ်ပေါက်လာလျှင် ကောင်းမည်ဟု ဒီမိုကရေစီရေး လှုပ်ရှားနေကြသူများအကြား အကြံပြု ပြောဆိုသံတွေ ထွက်ပေါ်လာသည်။ ပြင်ပတွင် ကျန်ရှိနေသည့် နိုင်ငံရေး ဦးစီးဦးဆောင် ပြုနေသူများလောက်နှင့် တိုက်ပွဲကို ရှေ့ဆက်ဖို့ မဖြစ်နိုင်ဟု ယုံကြည်နေကြ၍လည်း ထိုအကြံပြုသံများ ထွက်ပေါ်လာခြင်း ဖြစ်နိုင်သည်။ ထိုကဲ့သို့ အကြံပြုသည့်အတိုင်း တတိုင်းတပြည်လုံးက လေးစားလိုက်နာမည့် ခေါင်းဆောင်သစ်တဦး အချိန်တိုအတွင်း ပေါ်ပေါက်လာမည် ဆိုလျှင်တော့ ၀မ်းမြောက်ဝမ်းသာ ဖြစ်ကြရမည်မှာ အမှန်ပင်။ သို့သော် ထိုကိစ္စက စိတ်ကူးယဉ်သည့် အတိုင်း လွယ်ကူသည့် ကိစ္စမဟုတ်။ ဂါထာမန္တန်များနှင့် မန်းမှုတ်လိုက်ရုံဖြင့် ခေါင်းဆောင်တဦးက အလိုအလျောက် ပေါ်ထွက်လာနိုင်သည် မဟုတ်။ ထိုသို့ မဖြစ်နိုင်သည်ကို စိတ်ကူးယဉ်နေကြမည့်အစား (လက်ရှိအနေအထား လက်ရှိအင်အားနှင့်သာ) လက်တွေ့ကျကျ ရှေ့ဆက်တိုက်ပွဲဝင်နိုင်မည့် လုပ်ငန်းစဉ်တွေ ချမှတ် အကောင်အထည်ဖော်ဖို့ လိုသည်ဟု အကြံပြုချင်မိသည်။

လက်ရှိအခြေအနေတွင် ဦးဆောင်ပါတီဖြစ်သည့် အန်အယ်လ်ဒီမှ ကျန်ရှိနေသည့် ဗဟိုကော်မတီဝင်တွေက လည်း သူတို့တတ်နိုင်သလောက် ကြေညာချက်ထုတ်ပြီး တောင်းဆိုမှုတွေ လုပ်နေသည်။ ပြင်ပတွင် ကျန်ရှိနေသည့် သံဃာ့တပ်ပေါင်းစု၊ ကိုစိုးထွန်း၊ ကိုထွန်းမြင့်အောင်၊ မနီလာသိန်းတို့ ဦးဆောင်သည့် ၈၈-မျိုးဆက် ကျောင်းသားများအဖွဲ့၊ ကိုကျော်ကိုကိုနှင့် ဗကသ ကျောင်းသားများအဖွဲ့၊ Generation Wave ကဲ့သို့သော ကျန်နိုင်ငံရေး လှုပ်ရှားတက်ကြွနေသူများ၏ အဖွဲ့အစည်းများ၊ ထိုအဖွဲ့အတော်များများ ပေါင်းစည်းထားသည့် လူထုလှုပ်ရှားမှု ကြီးကြပ်ရေး ကော်မတီတို့က မိမိတတ်နိုင်သလောက် နိုင်ငံရေးလှုပ်ရှားမှုများကို ဆက်လက် ပုံဖော်နေကြသည်။

ခေါင်းဆောင်သစ်ကို ထိုင်မျှော်နေကြမည့်အစား ထို့သို့ တဦးချင်းဖြစ်စေ၊ တဖွဲ့ချင်းဖြစ်စေ တတ်နိုင်သလောက် အဆက်မပြတ် လှုပ်ရှားနေကြခြင်းက ရှေ့ဆက်ရမည့် တိုက်ပွဲအတွက် ကောင်းသည့် လက္ခဏာဟု မြင်မိသည်။ အရေးကြီးသည်က ပြင်ပတွင် ဆက်လက်လှုပ်ရှားနေကြသူ အချင်းချင်း ဆက်စပ်မိပြီး အချိန်ကိုက် ပေါင်းစည်း လှုပ်ရှားနိုင်အောင် ကြိုးစားကြဖို့ပင်ဖြစ်သည်။ ထိုသို့ ပေါင်းစည်းလှုပ်ရှားနေရင်းမှ အများလက်ခံသည့် ခေါင်းဆောင်သစ်လည်း ထပ်ပေါ်ချင် ပေါ်လာမည်။ မပေါ်လာလျှင်လည်း ကိစ္စမရှိ။ ပေါင်းစည်းလှုပ်ရှားမှုကို ပျက်ပျယ်မသွားစေဘဲ အဖွဲ့အစည်း အချင်းချင်း တိုင်တိုင်ပင်ပင်နှင့် ကိုယ်နိုင်သည့်တာဝန် ကိုယ်ယူကာ လူထုလှုပ်ရှားမှုကို ပြန်လည်ပုံဖော် နိုင်အောင် ၀ိုင်းဝန်းကြိုးပမ်းကြရမည် ဖြစ်သည်။ ရွှေဝါရောင်အရေးတော်ပုံကို သင်ခန်းစာယူ၍ တိုက်ပွဲအဆုံးအထိရောက်အောင် ချီတက်နိုင်မည့် နည်းဗျူဟာများကို တိုင်ပင် ပြင်ဆင်ထားကြရမည်။ နောက်ဆုံးအဆင့် စင်ပြိုင်အစိုးရဖွဲ့၍ ထိပ်တိုက်ရင်ဆိုင်နိုင်သည့် အနေအထားမျိုး အသင့်ဖြစ်နေအောင် ကြိုတင်ပြင်ဆင်ထားရမည်။

ထိုသို့ လူထုအုံကြွမှု ထပ်မံဖြစ်ပေါ် အားကောင်းလာပြီး ထိပ်တိုက်ရင်ဆိုင်နိုင်မှ စစ်အုပ်စုအနေနှင့် မျက်က လဲဆန်ပြာ ဖြစ်မည်။ ထို့သို့ မျက်ကလဲဆန်ပြာဖြစ်မှ ဒေါ်အောင်ဆန်းစုကြည်နှင့် တွေ့ဆုံဆွေးနွေး မည်ဟု ကတိက ၀တ်ပြုထားမှုကို စစ်အုပ်စုဘက်က လျင်လျင်မြန်မြန် အကောင်အထည် ဖော်လာမည်။ ဖမ်းဆီးခံထားရသည့် နိုင်ငံရေး အကျဉ်းသားများအားလုံးကို ဆွဲထုတ်နိုင်မည်။

လက်ရှိအခြေအနေတွင် ဖြစ်တည်နေသည့် နောက်ထပ် အားသာချက်တခုမှာ ရွှေဝါရောင် အရေးတော်ပုံ၏ ကျေးဇူးကြောင့် နိုင်ငံတကာဖိအား အထူးအားကောင်းလာခြင်းဖြစ်သည်။ ဂမ်ဘာရီ အဆက်မပြတ် လွန်းထိုး လှုပ်ရှားနေသည်။ တရုတ်အာဏာရှင်အစိုးရကပင်လျှင် ဂမ်ဘာရီကို အမြန်ဆုံး ပြည်ဝင်ခွင့်ပေးဖို့ တိုက်တွန်းလာသည်။ ဖိလစ်ပိုင်သမ္မတ အာရိုယိုကလည်း ဒေါ်အောင်ဆန်းစုကြည် လွှတ်ပေးရေးအတွက် ပြင်းပြင်းထန်ထန် ဖိအားပေး ပြောကြားနေသည်။ အမေရိကန်၊ ဗြိတိန်၊ ပြင်သစ်နိုင်ငံကြီး သုံးနိုင်ငံက ပူးတွဲကြေညာ ချက်ထုတ်ကာ မြန်မာ့အရေး သွေးမအေးကြဖို့ ကမ္ဘာ့ခေါင်းဆောင်များကို ဆော်သြလာသည်။ သို့သော် နိုင်ငံတကာဖိအား ဘယ်လောက်ကောင်းကောင်း လူထုလှုပ်ရှားမှုကို ပြန်ဖော်ပြီး ဖိအားမပေးနိုင်သရွေ့ ဒေါ်အောင်ဆန်းစုကြည်နှင့် တွေ့ဆုံဆွေးနွေး ရေးသည် ဖြစ်မြောက်လာမည် မဟုတ်။ နိုင်ငံရေးအကျဉ်းသားများ အားလုံးကို ဆွဲထုတ်နိုင်မည် မဟုတ်။ လက်နက်အားကိုးသည့် စစ်အုပ်စုအား နိုင်ငံတကာဖိအားနှင့် လူထုဖိအား (လူထုအုံကြွမှု) ညှပ်တိုက်နိုင်မှ အောင်ပွဲခံနိုင်မည် ယုံကြည်မိသည်။

ထို့အတွက် အားကောင်းနေသည့် နိုင်ငံတကာဖိအားတွေ သွေးမအေးသွားမီ လူထုလှုပ်ရှားမှုကို ပြန်ဖော် နိုင်အောင် အလျင်အမြန် ကြိုးပမ်းကြရမည်။ ပြည်သူလူထုကလည်း အဆုံးစွန်သော ဆင်းရဲကျပ်တည်းမှု နှင့် ရင်ဆိုင်နေရသည့်အတွက် ပေါက်ကွဲအုံကြွလိုသည့် အနေအထားမှာ တာစူနေသည်။ ထိုအနေအထားတွင် လူထုလှုပ်ရှားမှုကို ပြန်ဖော်နိုင်ရန်အတွက် တဦးချင်း တဖွဲ့ချင်း လုပ်နိုင်သည်များ၊ အဖွဲ့အချင်းချင်း ချိတ်ဆက် လုပ်ဆောင်နိုင်သည်များကို အလျင်အမြန် လုပ်ဆောင်ကြဖို့လိုသည်။

အိုင်တီနည်းပညာ တတ်ကျွမ်းသူများက အိုင်တီနည်းပညာနှင့် စစ်အုပ်စုကို ၀ိုင်းဝန်းထိုးနှက်ရမည်။ ပြည်တွင်းသို့ ပြန်ဝင်လှုပ်ရှားနိုင်သူများက အသေအချာ ချိတ်ဆက်ပြီး ပြန်ဝင်လှုပ်ရှားကြရမည်။ ပိုစတာကမ်ပိန်း၊ မှုတ်ဆေးကမ်ပိန်း၊ စတစ်ကာကမ်ပိန်း လုပ်နိုင်စွမ်းရှိသည့် အဖွဲ့တွေက ကမ်းပိန်းတွေ တရစပ် လုပ်ကြရမည်။ စစ်အုပ်စု၏ လူမဆန်သည့် ရက်စက်ယုတ်မာမှုများကို ပြည်သူလူထု အမှန်အတိုင်း သိရှိအောင် ရွှေဝါရောင် အရေးတော်ပုံ ဖြစ်ရပ်မှန် ဗွီစီဒီအခွေများကို ဖြန့်ဝေ ပြသကြရမည်။ နအဖလက်ကိုင်တုတ်တွေကို သွေးပျက်ချောက်ချားအောင် လုပ်နိုင်စွမ်းရှိသည့် အဖွဲ့တွေက သွေးပျက်ချောက်ချားအောင် လုပ်ဆောင်ကြရမည်။ စစ်အစိုးရ ယန္တရားအားလုံး ရပ်ဆိုင်းအောင် ဟန့်တားနှောင့်ယှက်နိုင်သည့် အဖွဲ့များက ၀င်ရောက်နှောင့်ယှက် ဟန့်တားရမည်။ သို့မှသာ ပြည်သူလူထုအနေနှင့် လမ်းပေါ်ထွက်သာပြီး လူထုအုံကြွမှုကို ပြန်လည် ပုံဖော်နိုင်မည် ဖြစ်သည်။

နိုင်ငံတကာရောက် ဒီမိုကရေစီတိုက်ပွဲဝင်များ အနေနှင့်လည်း ဒီမိုကရေစီရေး သွေးမအေးသွားအောင် ရွှေဝါရောင်တော်လှန်ရေး လပြည့်အထိမ်းအမှတ်နေ့များတွင် မြန်မာသံရုံးများရှေ့၌ တက်တက်ကြွကြွ ဆန္ဒပြကြဖို့လိုသည်။ လူမဆန်သည့် နအဖစစ်အစိုးရအား ကျားကန်ပေးနေသည့် တရုတ်အာဏာရှင်အစိုးရက ကျင်းပမည့် အိုလံပစ်ပွဲတော်ကို နိုင်ငံတကာက ၀ိုင်းဝန်းသပိတ်မှောက်ကြဖို့ တရုတ်သံရုံးများရှေ့တွင် အဆက်မပြတ် ဆန္ဒပြဆော်သြကြဖို့ လိုသည်။ တရုတ်အာဏာရှင်အစိုးရ၏ လုပ်ရပ်အား သပိတ်မှောက်ခြင်းသည် တရုတ်လူထု၏ အကျိုးစီးပွားကို ဆန့်ကျင်ခြင်းမဟုတ်ဟု ခေါင်းထဲစွဲမှတ်ပြီး အသိရှိရှိ လုပ်ဆောင်ကြဖို့လိုသည်။ သို့မှသာ တရုတ်အာဏာရှင်အစိုးရ အနေနှင့် နိုင်ငံတကာအလယ်တွင် အရှက်တကွဲ မဖြစ်စေရေးအတွက် လူမဆန်သည့် နအဖစစ်ခွေးများအပေါ် ဖိအားပေးလာမည်ဖြစ်သည်။ ထို့အပြင် ပြည်ပရှိ နိုင်ငံရေးအဖွဲ့အစည်းများ အနေနှင့်လည်း ပြည်တွင်း၌ လူထုအုံကြွမှု ပြန်ပေါ်လာပြီး စင်ပြိုင်အစိုးရ ပေါ်ထွက်နိုင်အောင်၊ ပေါ်ထွက် လာသည့်အခါ ၀ိုင်းဝန်းထောက်ခံနိုင်အောင် ယခုကတည်းက စနစ်တကျ ချိတ်ဆက် ပြင်ဆင်ထားဖို့ လိုသည်ဟု ထင်မြင်မိပါသည်။

အချုပ်အားဖြင့်ဆိုရလျှင် ၂၀၀၈ခုနှစ်အတွင်း၌ ပြည်တွင်းပြည်ပ ဒီမိုကရေစီတိုက်ပွဲဝင်များ အလျင်အမြန် အကောင်အထည်ဖော်ရမည့် လုပ်ငန်းစဉ်(၃)ခု ရှိနေသည်ဟု အကြံပြု ပြောကြားလိုပါသည်။ ထိုလုပ်ငန်းစု (၃)ခုမှာ …

(၁) ပြည်တွင်းရှိ တိုက်ပွဲဝင်များအနေနှင့် လူထုအုံကြွမှုကို ပြန်ဖော်နိုင်ဖို့ ကြိုးပမ်းကြရပါမည်။ ပြည်ပအင် အားစုများက လိုအပ်သည်များကို ၀ိုင်းဝန်းပံ့ပိုးပေးကြရပါမည်။

(၂) ပြည်ပရှိ တိုက်ပွဲဝင်များအနေနှင့် နအဖစစ်အုပ်စုကို အဓိက ကျားကန်ပေးနေသည့် တရုတ်အာဏာရှင် အစိုးရအား သပိတ်မှောက်ရေးနှင့် နိုင်ငံတကာဖိအားများ လျော့ကျမသွားရေးကို ဦးတည်လုပ်ဆောင်ကြရပါမည်။

(၃) ပြည်တွင်း ပြည်ပရှိ တိုက်ပွဲဝင်များအားလုံးအနေနှင့် လူထုအုံကြွမှုမှတဆင့် စင်ပြိုင်အစိုးရ ဖွဲ့စည်းပေါ် ထွက်လာခဲ့လျှင် တညီတညွတ်တည်း ၀ိုင်းဝန်းထောက်ခံကြဖို့ ယခုကတည်းက ချိတ်ဆက် ပြင်ဆင် ထားကြရမည်ဟု အကြံပြု ပြောကြားလိုပါသည်။ သို့မဟုတ်ပါက ဒေါ်အောင်ဆန်းစုကြည်နှင့် နိုင်ငံရေးအကျဉ်းသားများ အားလုံးကိုလည်း ဆွဲမထုတ်နိုင်၊ တွေ့ဆုံဆွေးနွေးရေးလည်း ဖြစ်နိုင်မည်မဟုတ်ဘဲ သေနတ်အားကိုးသည့် နအဖစစ်အုပ်စု ပန်းပန်မြဲပန်ကာ တိန်တိန်မြည်နေလိမ့်မည်ဟု သုံးသပ် ပြောကြားလိုက်ရပါသည်။

ဒေါက်တာလွဏ်းဆွေ
(၂၀၀၈ခုနှစ် ဖေဖော်ဝါရီလထုတ် ခေတ်ပြိုင်ဂျာနယ်တွင် ဖော်ပြထားသည့် ဆောင်းပါးဖြစ်ပါသည်)