တန်ဆောင်တိုင်ည အငြိမ့်ပွဲ(၃)(၄)နဲ့ (၅)

တန်ဆောင်တိုင်ည အငြိမ့်ပွဲ(၃)(၄)နဲ့ (၅)
လူရွှင်တော် ဇာဂနာ တင်ဆက်သည်

ကြယ်သီး ။ ။ ဒီနေ့ခေတ်ဆိုတာက သိပ်တိုးတက်နေပြီ ဟော အရင်က တမြို့နဲ့တမြို့ တနိုင်ငံနဲ့ တနိုင်ငံ စာရေးပြီး ဆက်သွယ်ကြရတယ်။ နောက်တော့ တယ်လီဖုန်းနဲ့ ခုတော့ အီးမေးလ်နဲ့ ချက်တင်းနဲ့ ဂျီတော့လ်က်နဲ။ ကဲ မတိုးတက်လား။ ခုဆို ကျနော် နေ့တိုင်း ညတိုင်း ကွန်ပျူတာရှေ့ ထိုင်ထိုင်နေတာ
စိန်သီး ။ ။ တကမ္ဘာလုံးနဲ့ ဆက်သွယ်နေတာပေါ့
ကြယ်သီး ။ ။ မီးမလာလို့ ထိုင်စောင့်နေရတာ
ပန်းသီး ။ ။ အော် အကောင်းပြောတာ မှတ်လို့ မီးမလာဘူး မီးမလာဘူးလို့ မပြောပါနဲ့ကွာ၊ ခုဆို ဓာတ်ငွေ့ကနေ လျှပ်စစ်တွေထုတ်၊ ရေကနေ လျှပ်စစ်တွေထုတ် တိရိစ္ဆာန်တွေရဲ့ အားနဲ့လည်း လျှပ်စစ်တွေ ထုတ်နေလို့ ၂၄နာရီ မီးထိန်ထိန်လင်းနေပါပြီ
ဆီးသီး ။ ။ တို့ ရန်ကုန်မြို့ကြီးမှာပေါ့
ပန်းသီး ။ ။ နေပြည်တော်မှာ
ဆီးသီး ။ ။ အင်
ပန်းသီး ။ ။ ဟိုက ခုမှ မြို့သစ် မင်းတို့က မြို့ဟောင်း၊ ပေး လင်းလိုက်ပါဦး
ဆီးသီး ။ ။ လမ်းပန်းဆက်သွယ်ရေးတွေလည်း တအားကောင်းသွားပါပြီ၊ လမ်းတွေ ဖောက်လိုက်တာမှ အများကြီး၊ တံတားတွေလည်း အစင်းပေါင်း ၃၀ကျော် ဆောက်ပြီးပြီ
စိန်သီး ။ ။ ဒါဆို သွားရေးလာရေးတွေ အဆင်ပြေနေပြီပေါ့
ဆီးသီး ။ ။ အင်ဂျင်နီယာတွေ ချမ်းသာကုန်ပြီ

စိန်သီး ။ ။ သတင်းကြေညာမယ် သတင်းကြေညာမယ်
ဂေါ်ဇီလာ ။ ။ မဟုတ်တာတွေ မမှန်တောတွေ ပြောရင် နားမထောင်ဘူး
စိန်သီး ။ ။ အကိုရယ် ကျနော်တို့က စီစီတီဗီ သတင်း
ဆီးသီး ။ ။ ဒါဆို ကြေညာစေဗျား၊ တို့သတင်းစာတွေထဲ မပါဘူး ကြေညာ
ပန်းသီး ။ ။ ဒါဆို ငါလည်း ကြေညာမယ် တို့က အယ်ဂျာဇီးယား
ဂေါ်ဇီလာ ။ ။ ကဲ ကြေညာကြစမ်း၊ ငါ ဒိုင်လူကြီး
စိန်သီး ။ ။ သတင်းကြေညာတာ ဒိုင် လိုသလား
ဂေါ်ဇီလာ ။ ။ သတင်းမှန်လား မမှန်လား ဒိုင်လုပ်ရမှ
စိန်သီး ။ ။ ပြီးရော ကြေညာပြီ၊ တရုတ်နဲ့မြန်မာ ချစ်ကြည်ရေးဘောပွဲ ကျင်းပရာ မြန်မာဘောလုံးအသင်းက သုံးဂိုး ဂိုးမရှိဖြင့် အနိုင်ရရှိသွားပါတယ်
(ဂေါ်ဇီလာနဲ့ ဆီးသီး ကြမ်းပေါ် လူးလှိမ့်ပြီး ရီ)
ဆီးသီး ။ ။ အမလေး တသက်တာ အကောင်းဆုံး ပျက်လုံးဆုပေးရင် နင်တို့ သတင်းဌာနက ရမယ်
ပန်းသီး ။ ။ ငါတို့ ကြေညာမယ်၊ ၂၀၀၈ခုနှစ် တရုတ် အိုလံပစ်အတွက် ချစ်ကြည်ရေးအဖြစ် တရုတ်ယပ်တောင် အချောင်းတသိန်းကို မြန်မာပြည်သို့ ပေးအပ်သွားမည ဖြစ်ကြောင်းနှင့် မြန်မာနိုင်ငံဘက်မှလည်း ချစ်ကြည်ရေးအဖြစ် ရခိုင်ရိုးမ၊ ပဲခူးရိုးမ၊ ရှမ်းရိုးမတို့တွင်ရှိသည့် သစ်တောများကို လက်ဆောင်အဖြစ် ပေးအပ်သွားမည်ဟု သိရှိရပါတယ်
(ဂေါ်ဇီလာနှင့် ဆီးသီး ဒေါပွ ထရိုက်)
ဂေါ်ဇီလာ ။ ။ တို့ကိုပေးတော့ ယပ်တောင် နင်တို့ကို ပြန်ပေးရတော့ သစ်တော တန်သလား
ပန်းသီး ။ ။ ရတဲ့အတိုင်း ကြေညာရတာ
စိန်သီး ။ ။ ရန်ကုန်မြို့တော် သန့်ရှင်းရေးအတွက် တရုတ်နိုင်ငံလုပ် အမှိုက်သိမ်းကားများကို အသုံးပြုနေရာ အနံ့အသက်တွေ ကောင်းပြီး အမှိုက်များ ကင်းစင်ကာ ရေမြောင်းတွေ ပိတ်ဆို့မှု မရှိတော့ဘဲ ပလက်ဖောင်းများပေါ် လူတွေ တက် လမ်းလျှောက်နေနိုင်ပြီ ဖြစ်ကြောင်း
ပန်းသီး ။ ။ ဓာတ်ဆီဈေးတွေ အရမ်းတက်နေလို့ အမှိုက်သိမ်းကားတွေ မထွက်နိုင်တော့လို့ အမှိုက်တွေ ပိတ်ဆို့ပြီး ရေမြောင်းတွေ ပိတ်ပြီး လူတွေ ပလက်ဖောင်းပေါ် လျှောက်နေကြရပြန်ပါပြီ
စိန်သီး ။ ။ အခုအခါမှာ ကားတွေ စီအင်ဂျီ အကုန်ပြောင်းပြီးဖြစ်လို့ အမှိုက်တွေ အကုန်သိမ်းပြီးသွားပြန်ပါတယ်
ပန်းသီး ။ ။ မီးမလာတဲ့အတွက် ကားများ တန်းစီနေရလို့ အမှိုက်မသိမ်းရတဲ့အတွက် ရေမြောင်းတွေ ပြန်ပိတ်ကုန်ပြန်ပါတယ်
စိန်သီး ။ ။ မြို့တော်ဝန်ကြီးကိုယ်တိုင် ခေါင်းလောင်းထိုးပြီး အမှိုက်သိမ်းလှည်းများနဲ့ လိုက်သိမ်းပေးနေလို့ အမှိုက်များ ကင်းစင်ပြီး ပလက်ဖောင်းပေါ် လူများလမ်းလျှောက်နေနိုင်ပါပြီ
ပန်းသီး ။ ။ မြို့တော်ဝန်ကပဲ ပလက်ဖောင်းပေါ် ဈေးရောင်းခွင့်ပြုလိုက်လို့ အမှိုက်များ ပြန်ပိတ်ပြီး ခရီးသွားပြည်သူများလည်း ပလက်ဖောင်းပေါ်လမ်းမလျှောက်နိုင်ဘဲ လမ်းမပေါ် ဆင်းလျှောက်နေရပါပြီ
စိန်သီး ။ ။ ပလက်ဖောင်းဈေးသည်တွေ စည်းနဲ့ကမ်းနဲ့ နေရာတကျ ဈေးရောင်းနိုင်အောင် စည်းကမ်း မလိုက်နာသူတွေ ထိထိရောက်ရောက် အရေးယူတဲ့အနေနဲ့ သုံးသိန်းစီ တောင်းပြီး ပြန်ဖွင့်ခိုင်းလိုက်ပါတယ်
(သတင်းကြေညာသူကို ၀ိုင်းရိုက်ကြ)

အဖွဲ့ ။ ။ သူများအကြောင်းလည်း မပြောတတ်ပါ စပ်မိစပ်ရာ ဘာညာကွိကွ
ဂေါ်ဇီလာ။ ။ လမ်းထိပ်နားက ကိုဖိုးကြွယ် လျှပ်စစ်မီးကို ခိုးပြီးသွယ် စစ်ဆေးရေးနဲ့ တဲ့တဲ့တိုးတော့
စိန်သီး ။ ။ ဖမ်းသွားရောလား
ဂေါ်ဇီလာ။ ။ ဟေး လာကွယ် မောင်ရို့ ဟေးလာကွယ် မောင်ရို့၊ ၀မ်းစမိုးရယ် သောသောညံ ရော့ အင့်
စိန်သီး ။ ။ ဒါဆို ခု မီး ခိုးမသွယ်တော့ဘူးပေါ့
ဂေါ်ဇီလာ။ ။ ကာရာအိုကေဆိုင်တောင် ဖွင့်ထားတယ်
အဖွဲ့ ။ ။ သူများအကြောင်းလည်း မပြောတတ်ပါ စပ်မိစပ်ရာ ဘာညာကွိကွ
ဆီးသီး ။ ။ ချဲထီဆိုတာ လောင်းကစားပဲ၊ နှစ်လုံးထိဆိုတာ လောင်းကစားပဲ၊ တွေ့ရင်ဖမ်းမှာပဲ၊ ပြည်သူ့ရဲနဲ့ တဲ့တဲ့တိုးတော့ စစ်ဆင်ရေးနဲ့ တဲ့တဲ့တိုးတော့
စိန်သီး ။ ။ ဖမ်းသွားရောလား
ဆီးသီး ။ ။ ဟေးလာကွယ် မောင်ရို့ ဟေးလာကွယ် မောင်ရို့၊ ၀မ်းစမိုးရယ် သောသောညံ ရော့ အင့်
ပန်းသီး ။ ဒါဆို ခု ချဲထီ မလုပ်တော့ဘူးပေါ့
ဆီးသီး ။ ။ ဘောပွဲပါ ဒိုင်ကိုင်နေပြီ
အဖွဲ့ ။ ။ သူများအကြောင်းလည်း မပြောတတ်ပါ စပ်မိစပ်ရာ ဘာညာကွိကွ
ပန်းသီး ။ ။ လာဘ်ပေးလာဘ်ယူ လုပ်သူများ အရေးယူနေပြီဗျား၊ သတိပေးစာတွေ ရုံးမှာကပ်တော့
ကြယ်သီး ။ ။ အရေးယူ ခံရရောလား
ပန်းသီး ။ ။ ဟေးလာကွယ် မောင်ရို့ ဟေးလာကွယ် မောင်ရို့၊ ၀မ်းစမိုးရယ် သောသောညံ ရော့ အင့်
ကြယ်သီး ။ ။ ရုံးတွေမှာ လာဘ်မစားတော့ဘူးပေါ့
ပန်းသီး ။ ။ အိမ်မှာ သွားပေးနေပြီ

(ဇာဂနာ့ စာကြွင်း - အငြိမ့်ခန်း ရေးနေရင်းက သူများဘလော့ဂ်တွေ လိုက်ဖတ်ရင်း သတိရမိတာလေးရှိလို့ ဖောက်သည်ချချင်လာပါတယ်။ မှတ်မှတ်ရရ ၁၉၈၈ အောက်တိုဘာလမှာ အဖမ်းခံခဲ့ရတုန်းကပေါ့။ ထောင်ထဲမှာ အခန်းဖော်လည်း မရှိ၊ အပြင်လည်း မထွက်ရ၊ လူစကား မေ့သွားမှာစိုးလို့ အခန်းထဲ ရောက်လာတဲ့ ကြွက်တွေ ပိုးဟပ်တွေ အိမ်မြောင်တွေ ပုရွက်ဆိတ်တွေနဲ့ စကားလိုက်ပြောနေရတာ။ သူတို့က ပြန်မပြောပေမယ့် ကိုယ်ကတော့ ဇွတ် လိုက်ပြောနေရတာ။ တဖြေးဖြေးနေရင်းနဲ့ ပုရွက်ဆိတ်တွေကို ကျနော် ကြည့်မရတော့ဘူး။ ကြည့်ရစရာလည်း တစက်မှ မရှိဘူး။ စဉ်းစားလေ။ ဘဲ့နဲ့။ ကိုယ့်မှာ စားစရာ ရှားပါးရတဲ့အထဲ ငါးခြောက်ဖတ်လေး တဖတ်လောက် သိမ်းထားတာ ဒီပရွက်ဆိတ်တွေက ၀ိုင်းခဲကြတယ်လေ။ ထောင်ကပေးတဲ့ ကြက်သားဖတ်လေး မနက်စာ ညနေစာ တ၀က်စီ ခွဲထားတာ နေ့လည် အိပ်နေတုန်း ဒီအကောင်တွေက ၀ိုင်းအုံပြီး သမကြပြန်ပါရော။ ဒီတော့ ကြည့်မရတာ အဆန်းလားဗျာ။ သင်းတို့ကို နှိမ်နှင်းမှ ရမယ်ပေါ့။ ဒါနဲ့ အစဉ်သင့် ရှိနေတဲ့ ပရုတ်ဆီနဲ့ အဲဒီပုရွက်ဆိတ်တွေကို စည်းဝိုင်းထားလိုက်တာ အဲဒီကောင်တွေ ပထမတော့ ငါးခြောက်ဖတ် မဲနေရာကနေ ပြီးလို့ လှည့်ပြန်မယ် လုပ်တော့မှ ပရုတ်ဆီတွေ့ပြီး နောက်ပြန်ဆုတ် အထဲမှာတင် ပတ်ပြေးနေတော့တာ ပရုတ်ဆီစည်းဝိုင်းထဲက ထွက်ဖို့ကို မစဉ်းစားတော့ဘူး။ နောက်ဆုံး အချင်းချင်း ပြန်ကိုက်ရင်းနဲ့ အကုန်လုံး အမှုန့်လေးတွေ ဖြစ်သွားပါလေရောဗျာ။ တရက်လည်းမဟုတ် နှစ်ရက်လည်းမဟုတ် ဘယ်နှစ်ရက်ပဲဖြစ်ဖြစ် ကျနော် စမ်းသပ်ခဲ့တာ အကြိမ်တိုင်း အခါတိုင်း ပုရွက်ဆိတ်တွေဟာ ပရုတ်ဆီ စက်ဝိုင်းထဲက ထွက်ဖို့တခါမှ မစဉ်းစားဘဲ အချင်းချင်းကိုက်ရင်း အမှုန့်ဘ၀နဲ့ပဲ ဇာတ်သိမ်းသွားခဲ့တာပါပဲ။ အဲဒါ အများလည်း စဉ်းစား နိုင်အောင်လို့ တင်ပြလိုက်ရတာပါ။ ကျနော်တို့ဟာ အခု ပရုတ်ဆီ အ၀ိုင်းခံနေရတာပါ။ သတိပြုမိရင် တော်ပါပြီဗျာ။ ။

(ဇာဂနာဘလော့ဂ်မှ ကူးယူဖော်ပြပါသည်)