ကွန်မြူနစ်နဲ့ စစ်အာဏာရှင် ဘယ်သူ ပိုဆိုးသနည်း

ဒေါင်းတမန်
သရုပ်ဖော် - ပန်းချီတင်ကိုကိုဦး

စစ်အစိုးရ နှစ်ဆက်၏ ၄၅နှစ်ကြာ သမိုင်းကြောင်းကို ပြန်လှည့်ကြည့်လိုက်လျှင် ၄င်းတို့ ပစ်မှတ်ထားသော အဓိက ရန်သူမှာ ကွန်မြူနစ်များ ဖြစ်နေသည်ကို တွေ့ရသည်။

အမှန်ဆိုရလျှင် ကွန်မြူနစ်ပါတီသည် ၈၈ အရေးအခင်းပြီး နောက်တွင် ပါတီ မည်ကာမတ္တမျှသာ ရှိတော့သော်လည်း စစ်အစိုးရ အနေနှင့်မူ ၄င်းတို့ကို ဆန့်ကျင်နေသော ဒီမိုကရေစီ အင်အားစုများကို ကွန်မြူနစ် ယူဂျီများဟု မျက်စိမှိတ် စွပ်စွဲလို့ ကောင်းနေတုန်း ဖြစ်သည်ကို တွေ့ရသည်။

စစ်အာဏာရှင် အစိုးရ၏ သက်တမ်း တလျှောက်တွင် ကွန်မြူနစ်များ၏ မကောင်းကြောင်းများကို ရှာဖွေ၍ အကြိမ်ကြိမ် အဖန်ဖန် ရေးသား ဟောပြောပြီး ၀ါဒဖြန့်ချိရေး တိုက်ပွဲကို စွဲစွဲမြဲမြဲ လုပ်လာခဲ့သည်ကို တွေ့ရပါ သည်။ ကွန်မြူနစ်ရန်မှ ကာကွယ်ခြင်းသည်ပင်လျှင် တိုင်းပြည်ကို အန္တရာယ်ဆိုးမှ ကယ်တင်သည့် သမိုင်းပေး တာဝန် ဖြစ်သယောင် ပဏာယူနေကျလည်း ဖြစ်သည်။

၎င်းတို့၏ ကွန်မြူနစ်များ အပေါ် အပုပ်ချ စွပ်စွဲခဲ့သော အချက်များကို ကြည့်လျှင် အောက်ပါတို့ကို တွေ့ရပါလိမ့်မည်။

(၁) ကွန်မြူနစ်များသည် ဘာသာမဲ့များဖြစ်သည်။ (သို့သော် သူတို့သည် မည်သည့် ဘာသာကိုမျှ လူသိထင်ရှား ကျူးလွန် စော်ကားခြင်း မရှိခဲ့ပါ။)

(၂) သခင်သန်းထွန်းက ရွှေတိဂုံဘုရားမှ ရွှေသင်္ကန်းများကိုခွာ၍ အရည်ကျိုပစ်ပြီး နိုင်ငံတည်ဆောက် ရမည်ဟု ကြုံးဝါးခဲ့သည်ဟု ဆိုပါသည်။ (တဆင့် စကားသာ ကြားရခြင်း ဖြစ်သည်။ ခိုင်မာသော အထောက်အထား မရှိပါ။)

(၃) ယဉ်ကျေးမှု တော်လှန်ရေး၏ ဂယက်ဖြစ်သော ဖြုတ်ထုတ်သတ် အရေးအခင်းတွင် အချင်းချင်း ၀ါးရင်းတုတ်များနှင့် ရိုက်သတ်သည်အထိ ရက်စက်ကြမ်းကြုတ်မှုများ ရှိခဲ့သည် ဆိုသည်။

(၄) ခေါင်းဆောင်များ အရည်အချင်း မရှိခြင်း ဥပမာအဖြစ်၊ အရင်းကျယ်ပြီး အဖျားရှူးသော လမ်းများ တည်ဆောက် ရမည်ဟု စာအုပ်ထဲမှ ဓာတ်ပုံကို ပုံတူကူးချသည့် အဖြစ်အပျက်ကို မရိုးနိုင်အောင် ပြောခဲ့ကြသည်။

ထိုအချက်များနှင့်ပင် နအဖ အစိုးရကို ချိန်ထိုး ကြည့်ကြစို့။

(၁) နအဖ စစ်ခေါင်းဆောင် များသည် ဗုဒ္ဓဘာသာဝင်များဟု ဟန်ဆောင် ထားကြသည်။ ဘုရားတည်ခြင်း၊ အလှူအတန်း ပြုခြင်းတို့ကို တွင်တွင်ကြီးလုပ်၊ ရှိုးထုတ်ကြသည်။ (သို့သော် မိမိအာဏာကို ထိပါးလာသောအခါ သံဃာကိုသတ်၊ ဘုန်းကြီးကျောင်းတွေကို ဖျက်ဆီး၊ သာသနာတော်ကို ညှိုနွမ်းအောင် လုပ်ရက်ခဲ့သည်မှာ ဖျက်မရသော သက်သေ အထောက်အထားများ ကျန်လေပြီ။)

(၂) နအဖ အစိုးရသည် ရွှေတိဂုံဘုရားကို မောင်ပိုင်စီးကာ အများပြည်သူ လွတ်လွတ်လပ်လပ် တက်ရောက် ကြည်ညိုခွင့်ကို ပိတ်ပင်သည်။

(၃) နအဖ သည် လက်နက်မပါသော လူထုကို အနီးကပ် ပစ်သတ်ရုံသာမက။ မသေသေးသော သူကိုပင် မီးသင်္ဂြုံဟ်စက်ထဲ ထည့်ခိုင်းသည်အထိ ရက်စက်ပါပေသည်။

(၄) ၄င်းတို၌ အရည်အချင်း မရှိပုံကို အထူးတလည် ပြောဖို့မလိုပါ။ ၄င်းတို့ လက်ထက်မှာ သယံဇာတ ကြွယ်ဝသော၊ လူ့အရင်းအမြစ် တောင့်တင်းသော ကျနော်တို့ တိုင်းပြည် ဖြူကာပြာကာ ကျသွားသည်ကိုသာ ကြည့်လိုက်ကြပါတော့။ (အကောင်းဆုံး ဥပမာကို ပြောရရင်တော့ PH7 ထက်များတဲ့ ရေကို ထုတ်ခိုင်းတဲ့ ခေါင်းဆောင်ကြီးကို ပြရမှာပဲ။)

နိဂုံးအနေနဲ့ ပြောရရင် ကျနော် ကွန်မြူနစ် မဟုတ်ပါခင်ဗျား။ နအဖနှင့် ဗကပ ဘယ်သူ ပိုဆိုးသလဲဆိုတဲ့ မေးခွန်းလေး ခေါင်းထဲဝင်လာလို့ ယှဉ်ထိုးကြည့်မိခြင်း ဖြစ်ပါသည်။
မိတ်ဆွေများကော ဘယ်လို ယူဆပါသလဲ။

ဒေါင်းတမန်