နအဖ ဒေါက်တိုင်တွေကို ဖြို၊ တရုတ် အိုလံပစ်ကို သပိတ်မှောက်

ဒေါက်တာလွဏ်းဆွေ

စက်တင်ဘာ ရွှေဝါရောင် အရေးတော်ပုံ ကတော့ နအဖ စစ်ခွေးဘီလူးတွေရဲ့ လူမဆန်တဲ့ နှိပ်ကွပ် နှိမ်နင်းမှုတွေ ကြောင့် အခိုက်အတန့်အားဖြင့် ရပ်တန့် ငြိမ်သက်သွားသလို ဖြစ်နေပါတယ်။ ဒါပေမယ့် အပြီးတိုင် ရပ်တန့် ငြိမ်သက် သွားတယ်လို့တော့ တပ်အပ် ပြောလို့မရပါဘူး။ အကြောင်းကတော့ အခု ရပ်တန့် ငြိမ်သက်သွားတဲ့ အခြေအနေက ၁၉၈၈ စက်တင်ဘာ (၁၈)ရက်မှာ န၀တစစ်အုပ်စု အာဏာသိမ်းပြီး ပစ်ခတ်ဖြိုခွင်း ခဲ့စဉ်တုန်းက ငြိမ်သက် သွားခြင်းမျိုးနဲ့ မတူလို့ပါပဲ။

၁၉၈၈ စက်တင်ဘာတုန်းက အာဏာသိမ်းပြီး တက်လာတဲ့ န၀တ စစ်အုပ်စုအနေနဲ့ ဆန္ဒပြပွဲတွေကို ပစ်ခတ် နှိမ်နင်းပြီး နောက်ပိုင်းမှာ (ဟုတ်တာ မဟုတ်တာ အပထား) ပြည်သူလူထုကို မျှော်လင့်ချက်တွေနဲ့ ချွေးသိပ်ပြီး ငြိမ်သက်အောင် ပြုလုပ်နိုင်ခဲ့ပါတယ်။ န၀တဟာ မဆလ အရေခြုံ စစ်အစိုးရကို ဖြုတ်ချ အာဏာသိမ်းပြီး တက်လာတဲ့ စစ်အစိုးရ တရပ်ပဲမို့ လူထုအနေနဲ့ လုံးဝ မနှစ်မြို့တာကတော့ အမှန်ပါ။ ဒါပေမယ့် ဘယ်လို အပြောင်းအလဲတွေများ လုပ်ပေးလေမလဲ ဆိုတဲ့ မျှော်လင့်ချက်တွေနဲ့ ငြိမ်သက်သွားတာ ဖြစ်ပါတယ်။

အာဏာသိမ်း န၀တစစ်အုပ်စုက ပြည်သူတွေ အပေါ် ဘယ်လို မျှော်လင့်ချက်တွေ ပေးခဲ့တာလဲဆိုတော့ …
(၁) နိုင်ငံရဲ့ စီးပွားရေးစနစ်ကို ဈေးကွက်စီးပွားရေးပုံစံ ပြောင်းလဲ ကျင့်သုံးမယ်လို့ ကြေညာခြင်း
(၂) နိုင်ငံရေး ပါတီများကို လွတ်လပ်စွာ မှတ်ပုံတင် ဖွဲ့စည်းခွင့်ပေးခြင်း
(၃) တနှစ်အတွင်း လွတ်လပ်ပြီး တရားမျှတတဲ့ ပါတီစုံ ဒီမိုကရေစီ အထွေထွေ ရွေးကောက်ပွဲကို ကျင်းပပေးပြီး အနိုင်ရတဲ့ ပါတီကို အာဏာလွှဲကာ စစ်တန်းလျားကို ပြန်မယ်လို့ ကတိက၀တ် ပြုခြင်း
… စတဲ့ မျှော်လင့်ချက်တွေ ပေးခဲ့တာပဲ ဖြစ်ပါတယ်။ အဲဒီလို ကြေညာပြီး အာဏာသိမ်း ခဲ့တာဆိုတော့ ပြည်သူ လူထုကလည်း ဟုတ်လေနိုးနိုး ဆိုတဲ့ စောင့်စားမှုတွေနဲ့ ငြိမ်သက်သွားခဲ့တာ ဖြစ်ပါတယ်။

အခု စက်တင်ဘာ အရေးတော်ပုံကို ပစ်ခတ်နှိမ်နင်းပြီး နောက်ပိုင်း ငြိမ်သက်သွားပုံ ကတော့ ၈၈ တုန်းက ပစ် ခတ်နှိမ်နင်းပြီး နောက်ပိုင်း ငြိမ်သက်သွားသလိုမျိုး မဟုတ်ပါဘူး။ ပြည်သူလူထု အနေနဲ့ အမှန်တကယ် ငြိမ်သက်သွားပြီလို့ကို ပြောလို့မရတာပါ။ ဘာဖြစ်လို့လဲဆိုတော့ အခုအနေအထားက ပစ်ခတ် နှိမ်နင်းပြီး နောက်ပိုင်း လူထုလိုလားတဲ့ အစိုးရသစ်တရပ် ပေါ်ထွန်းမလာတဲ့အပြင် လူထု မုန်းတီးစက်ဆုပ်တဲ့ နအဖစစ်အစိုးရပဲ ဆက်လက် တည်ရှိနေတာက လူထုကို အကြီးအကျယ် ဒေါသဖြစ်နေစေလို့ပါပဲ။ အဲသလို လက်ရှိ စစ်အုပ်စုအပေါ် လူထုက အော့နှလုံးနာ ရွံရှာ မုန်းတီးနေတဲ့ အကြောင်းတရားတွေထဲမှာ ဗုဒ္ဓဘာသာ မြန်မာလူမျိုးတွေ အထွတ်အမြတ်ထား ကိုးကွယ်ဆည်း ကပ်တဲ့ ရတနာသုံးပါးထဲက တပါးဖြစ်တဲ့ ရဟန်းသံဃာတွေကို ရိုက်နှက်ဖမ်းဆီး ညဉ်းပန်းနှိပ်စက် ပစ်ခတ် သတ်ဖြတ်ခဲ့တဲ့ လူမဆန်တဲ့ လုပ်ရပ်က အဓိက အကြောင်းတရား ဖြစ်ပါတယ်။ စစ်အုပ်စုရဲ့ အဲဒီလူမဆန်လုပ်ရပ်ဟာ အဆိုးဝါးဆုံးနဲ့ ခွင့်မလွှတ်နိုင်ဆုံး ပြစ်မှုကြီးအဖြစ် မြန်မာပြည်သူတွေရဲ့ ရင်ထဲကို ဆူးကြီးကြီးတချောင်း စူးဝင်စေခဲ့တာ ဖြစ်ပါတယ်။

ဒီလိုအခြေအနေမှာ နအဖ စစ်အုပ်စုအနေနဲ့ ဒေါသအမျက် ချောင်းချောင်း ထွက်နေတဲ့ ပြည်သူလူထု ရင်ထဲက မကျေနပ်မှု ဆိုတဲ့ ဧရာမ အစိုင်အခဲကြီးကို ပြေပျောက်အောင် ဖြေရှင်းဖို့ မကြိုးစားဘဲ (ကြိုးစားလည်း မြန်မာပြည်သူ လူထုက ဘယ်သောအခါမှ ခွင့်လွှတ်တော့မှာ မဟုတ်ပါဘူး) ဘယ်လို လှန့်လုံး လိမ်လုံး ညာလုံးတွေနဲ့ လှည့်စားဦးမလဲ၊ အဲဒီလို လိမ်ညာဖို့လည်း အခွင့်အရေး ရပါတော့ဦးမလား ဆိုတာတွေဟာ အတော် စိတ်ဝင်စားဖို့ ကောင်းတဲ့ မေး ခွန်းတွေပါ။ နအဖ စစ်အုပ်စုဆိုတာ န၀တကို အရေခွံလဲပြီး အုပ်ချုပ်နေတဲ့ စစ်အုပ်စုပဲဖြစ်လို့ အမည်နာမတွေ ဘယ်လိုပဲ ပြောင်းပြောင်း လူလိမ်တွေ အဖြစ်ပဲ အားလုံးက သိနေကြတာပါ။ ကုလားကြီးနဲ့ အရာကြီးလို အခေါ်အဝေါ်ပဲ ကွာသွားတာပါ။ ၁၉နှစ်ကျော် ကာလတလျှောက်လုံး ပြည်တွင်းကိုရော နိုင်ငံတကာ အသိုင်းအ၀ိုင်းကိုပါ မျက်နှာပြောင်ပြောင်နဲ့ အမျိုးမျိုး လှည့်စား အချိန်ဆွဲပြီး အရှက်မရှိ အုပ်ချုပ်နေတဲ့ သူတွေမို့ လူလိမ်တွေလို့ ပြောရတာ ဖြစ်ပါတယ်။

ပြည်သူလူထုအနေနဲ့ စစ်အုပ်စုအပေါ် အယုံအကြည် အကင်းမဲ့ဆုံး အချက်ကတော့ သူတို့ကိုယ်တိုင် ကမ္ဘာသိ ဦးစီး ကျင်းပပေးခဲ့တဲ့ ၁၉၉၀ပြည့် ပါတီစုံဒီမိုကရေစီ အထွေထွေ ရွေးကောက်ပွဲ ရလဒ်ကို အကောင်အထည် ဖော်မပေးဘဲ မျက်နှာပြောင်တိုက် အုပ်ချုပ်နေတာကိုပါ။ ဒါ့အပြင် စစ်အုပ်စုအနေနဲ့ ရွေးကောက်ပွဲမှာ အနိုင်ရရှိတဲ့ အန်အယ်လ်ဒီ ပါတီဝင်တွေကို အပြစ်မဲ့ ဖမ်းဆီးထောင်ချတဲ့အပြင် လူထုခေါင်းဆောင် ဒေါ်အောင်ဆန်းစုကြည်ကိုပါ ဒီပဲယင်း လူသတ်ပွဲကြီးနဲ့ လုပ်ကြံသတ်ဖြတ်ဖို့ ကြိုးစားခဲ့တာတွေဟာ လူထုရဲ့ အယုံအကြည်ကင်းမဲ့မှုကို တိုးပြီး ခံယူရရှိစေခဲ့တဲ့ အကြောင်းတရားတွေပဲ ဖြစ်ပါတယ်။ အဲသလို အနေအထားမျိုးမှာ သူတို့ ဇွတ်တရွတ် ကျင်းပပြုလုပ်နေတဲ့ အတုအယောင် အမျိုးသားညီလာခံနဲ့ လမ်းပြမြေပုံ (၇)ချက်ကို လူထုက လုံးဝ အယုံအကြည် မရှိခြင်းဟာ ထူးဆန်းတဲ့အချက် မဟုတ်တော့ပေဘူးပေါ့။

အဲသလို အယုံအကြည်ကင်းမဲ့မှု ဂိတ်ဆုံးနေတဲ့အချိန်မှာ အခုလို ငြိမ်းချမ်းစွာ ၀တ်ပြုဆုတောင်း စီးတန်း လှည့်လည်ကြတဲ့ အပြစ်မဲ့ သံဃာတွေ၊ ကျောင်းသားတွေနဲ့ ပြည်သူတွေကို ရိုက်နှက် ဖမ်းဆီး ညဉ်းပန်း နှိပ်စက် ပစ်ခတ် သတ်ဖြတ် လိုက်တာဟာ စစ်အုပ်စုနဲ့ ပြည်သူအကြား ရန်ငါစည်းကို အပြတ်ခြားလိုက်သလို ဖြစ်သွားခဲ့ပါတော့တယ်။

ဒီစက်တင်ဘာ ရွှေဝါရောင် အရေးတော်ပုံမှာ ၈၈နဲ့မတူ တမူထူးခြားတာက အင်တာနက် ဆက်သွယ်ရေး နည်းပညာ တိုးတက်မှုတွေရဲ့ ကောင်းကျိုးကြောင့် နအဖစစ်အုပ်စုရဲ့ လူမဆန်တဲ့ လုပ်ရပ်တွေကို နေ့ချင်းညချင်း နိုင်ငံတကာက သိအောင် အသေးစိတ် မှတ်တမ်းတင် ဖွင့်ချနိုင်ခဲ့ခြင်းပဲ ဖြစ်ပါတယ်။ အဲဒီ ဓာတ်ပုံ၊ ဗွီဒီယို မှတ်တမ်းတွေကြောင့်ပဲ ကုလသမဂ္ဂ လုံခြုံရေးကောင်စီ အရေးပေါ် အစည်းအဝေး ခေါ်ယူပြီး မြန်မာနိုင်ငံ အကြောင်း ဆွေးနွေးရ၊ ကုလသမဂ္ဂ အတွင်းရေးမှူးချုပ်ရဲ့ အထူးကိုယ်စားလှယ် မစ္စတာ အီဗရာဟင် ဂမ်ဘာရီကို မူလသတ်မှတ်ထားတဲ့ အချိန်ဇယားထက် စောပြီး မြန်မာနိုင်ငံကို အရေးပေါ် စေလွှတ်ရ ဆိုတာမျိုးတွေ ဖြစ်လာခဲ့ရတာပါ။

အဲဒီ အထောက်အထား တွေကြောင့်ပဲ စစ်အုပ်စုအနေနဲ့ နိုင်ငံတကာကို ဆက်ပြီး လိမ်ညာလှည့်ဖျားဖို့ မ ဖြစ်နိုင်တော့တဲ့ အခြေအနေကို ဆိုက်ရောက်ခဲ့တာပါ။ အခုဆိုရင် အတိုက်အခံ ခေါင်းဆောင် ဒေါ်အောင်ဆန်းစုကြည်နဲ့ တွေ့ဆုံ ဆွေးနွေးပါမယ်ဆိုတဲ့ လေသံတွေတောင် စစ်အုပ်စုဘက်က ဟလာရပါပြီ။ ဒေါ်အောင်ဆန်းစုကြည်နဲ့ တွေ့ဆုံ ဆွေးနွေးစရာ အကြောင်းလုံးဝမရှိဘူးလို့ တလျှောက်လုံး အပေါ်စီးက ပြောကြားခဲ့တဲ့ စစ်အုပ်စုအနေနဲ့ ဖိအားတွေ ပိုပိုများလာတဲ့ အတွက် အသက်ရှူချောင်အောင် ထွက်ပေါက်ရှာလာတဲ့ သဘောလို့ ယူဆရပါတယ်။ အခုဆိုရင် အမေရိကန်၊ အီးယူ၊ သြစတြေးလျနဲ့ ဂျပန်နိုင်ငံတို့ရဲ့ စီးပွားရေးအရ အရေးယူ ပိတ်ဆို့မှု တွေကလည်း ပိုမိုပြင်းထန် လာတဲ့အတွက် နအဖစစ် အုပ်စုရဲ့ ရပ်တည်ရေးဟာ ပိုလို့ အကျပ်အတည်း ဆိုက်လာတာကို တွေ့နေရပါပြီ။

ဒါပေမယ့် တရုတ်၊ ရုရှား၊ အိန္ဒိယနဲ့ အာဆီယံနိုင်ငံ တချို့ကတော့ စစ်အုပ်စုအပေါ် အရေးယူ ပိတ်ဆို့မှုတွေကို ဆန့်ကျင်ပြီး လူမဆန်တဲ့ စစ်အုပ်စုနဲ့ အပြုသဘော ဆက်ဆံလိုတဲ့ အရိပ်အယောင်တွေ ပြောဆိုနေတာကို တွေ့ နေရဆဲ ဖြစ်ပါတယ်။ အဆိုးဆုံး ကတော့ တရုတ်အစိုးရပါပဲ။ တရုတ်အစိုးရဟာ မြန်မာပြည်အရေးကို ပြည်တွင်းရေး သက်သက်သာ ဖြစ်တယ်လို့ တလျှောက်လုံး ပြောဆိုရင်း သူချည်းပဲ ပြည်တွင်းရေးကို ၀င်ရောက် စွက်ဖက်ကာ စစ်အုပ်စုကို ကျောထောက်နောက်ခံ ပြုနေတာ အထင်အရှား တွေ့နေရပါတယ်။ ဒါဟာ မြန်မာပြည် အရေးအပေါ် စေတနာ မမှန်တဲ့ တရုတ်အစိုးရကို ဆန့်ကျင် ကန့်ကွက်မှုတွေ ပြင်းပြင်းထန်ထန် လုပ်ဆောင်ဖို့ လိုအပ်နေတယ် ဆိုတာကို ပြဆိုနေတာပဲ ဖြစ်ပါတယ်။

အခုဆိုရင် လူမဆန်တဲ့ စစ်အုပ်စုကို အထောက်အကူ ပြုနေတဲ့ တရုတ်အစိုးကို အရှက်တကွဲ အကျိုးနည်းစေမယ့် အကြောင်းတရား ကလည်း ထင်ထင်ရှားရှား တွေ့မြင်နေရပါပြီ။ ဒါကတော့ ၂၀၀၈ခုနှစ်မှာ ကျင်းပမယ့် ပီကင်းအို လံပစ် ပွဲတော်ကို တကမ္ဘာလုံး အတိုင်းအတာနဲ့ တက်ညီလက်ညီ ၀ိုင်းဝန်း သပိတ်မှောက်အောင် လုပ်ဆောင်ကြဖို့ပါပဲ။ ဖြစ်နိုင်ရင် နိုင်ငံတကာမှာရှိတဲ့ တရုတ်သံရုံးတွေနဲ့ နအဖသံရုံးတွေရှေ့မှာ တပတ်တခါလောက် သွားပြီး အင်တိုက်အားတိုက် သပိတ်မှောက် ဆန္ဒပြကြရမှာ ဖြစ်ပါတယ်။ ဒါမှ လူမဆန်တဲ့ စစ်အုပ်စုအပေါ် တရုတ်အစိုးရရဲ့ အထောက်အကူ ပြုနေမှုတွေ လျော့ပါးပြီး စစ်အုပ်စုကို တရုတ်က ဖိအား ပိုပေးလာမှာ ဖြစ်ပါတယ်။ ဒါဟာ ဒီမိုကရေစီ အင်အားစုတွေ တက်ညီလက်ညီ လုပ်ဆောင်ရမယ့် ထိရောက်တဲ့ တိုက်ကွက်တခု ဖြစ်ပါတယ်။

အဲဒီအချိန်မှာ ကုလသမဂ္ဂ ဦးဆောင်တဲ့ နိုင်ငံတကာ ဖိအားကလည်း တိုးမြင့်လာမှာ ဖြစ်တဲ့အတွက် လိမ်ဖို့ အချိန်ဆွဲဖို့ ကြိုးစားချင်နေသေးတဲ့ စစ်အုပ်စုအနေနဲ့ ဘေးကျပ်နံကျပ်ဖြစ်ပြီး အတိုက်အခံ ခေါင်းဆောင် ဒေါ်အောင်ဆန်းစုကြည်နဲ့ ဈေးမဆစ်ဘဲ တွေ့ဆုံဆွေးနွေးရမယ့် အခြေအနေကို မလွဲမသွေ ဆိုက်ရောက်လာမှာပါ။ ဒါပေမယ့် ဒီအခြေအနေတွေကို ပြည်တွင်းက ပြည်သူလူထုအနေနဲ့ လက်ပိုက်ပြီး စောင့်စားနေလို့ မရပါဘူး။ ပြည်တွင်းမှာလည်း လူတဦးချင်း၊ တဖွဲ့ချင်းအလိုက် စစ်အုပ်စုကို ကျားကန်ပေးနေတဲ့ နအဖ လက်ကိုင်တုတ် စစ်သား၊ ရဲ၊ ကြံ့ဖွတ်၊ စွမ်းအားရှင်နဲ့ သတင်းပေးတွေကို ကိုယ့်ရှိသမျှ အကြံဥာဏ်၊ ကိုယ့်ရှိသမျှ အင်အားနဲ့ အလစ်အငိုက် ဖြိုချတာတွေ၊ အခွင့်အရေးရရင် ရသလို အလစ်အငိုက် ဆန္ဒပြ သပိတ်မှောက်တာတွေ လုပ်ဆောင်ပြီး စစ်အုပ်စုကို ဆက်လက် ဖိအားပေးနေဖို့ လိုပါတယ်။

အချုပ်အားဖြင့် ပြောရရင်တော့ ၂၀၀၇- စက်တင်ဘာ အရေးတော်ပုံရဲ့ အားပြင်းတဲ့ ထိုးနှက်ချက်ကြောင့် မြန်မာ ပြည်ကို ၄၅နှစ်ကျော် ခြေကုပ် ဖက်တွယ်နေခဲ့တဲ့ စစ်အာဏာရှင် သစ်မြစ်ဆွေးကြီးဟာ အပေါ်ကို သိသိသာသာ ကြွတက်လာပါပြီ။ အဲဒီကတဆင့် မကြာမတင်မှာ ဗုံးဗုံးလဲပြိုတဲ့ အခြေအနေ ရောက်အောင် …
(၁) ပြည်တွင်းမှာရှိတဲ့ နအဖ ဒေါက်တိုင်တွေကို ဖြိုချမှု၊ အလစ်အငိုက် သပိတ်မှောက် ဆန္ဒပြမှု
(၂) နိုင်ငံတကာ ဖိအားတွေ တိုးသထက် တိုးအောင် ၀ိုင်းဝန်း အထောက်အကူပြုမှု
(၃) စစ်အုပ်စုကို ကျားကန် ပေးနေတဲ့ တရုတ်အစိုးရ အရှက်တကွဲ အကျိုးနည်းစေဖို့ ၂၀၀၈ ပီကင်းအိုလံပစ်ကို တကမ္ဘာလုံးက သပိတ်မှောက်အောင် တက်ညီလက်ညီ ကြိုးပမ်းမှု … စတဲ့ အင်အားတွေနဲ့ အပြီးတိုင် တွန်းလှဲ ဖြိုချပစ်ရမှာဖြစ်ကြောင်း အကြံပြု တင်ပြလိုက်ရပါတယ်။

(ယနေ့ ၉-၁၁-၂၀၀၇နေ့ထုတ် ခေတ်ပြိုင်ဂျာနယ်တွင် ဖော်ပြထားသည့် ဆောင်းပါး ဖြစ်ပါသည်)