မမြင်ချင်ယောင်ဆောင်ထားသည့် မြန်မာ့ကျောက်စိမ်းအနာဂတ်

မိုးညို
ဆဲဗင်းဒေးဂျာနယ်၊ အတွဲ (၁၃)၊ အမှတ်(၄၂)

စစ်တပ်ထိပ်ပိုင်းဗိုလ်ချုပ်ကြီးများ၏ မိသားစုများ၊ ဆွေမျိုးများ၊ ထိပ်သီးစီးပွားရေးလုပ်ငန်းရှင်ကြီးများ၏ အသည်းနှလုံးမှာ မြန်မာနိုင်ငံမြောက်ဖျားပိုင်း ကချင်ပြည်နယ် တစ်နေရာတွင် ရှိပါသည်။

ဆောင်းရာသီတွင် ဆီးနှင်းများ ထူထပ်စွာကျဆင်းပြီး မိုးကာလ၌ မိုးသည်းထန်စွာ ရွာသွန်းလေ့ရှိသည့် ကချင်ပြည်နယ် ဖားကန့်မြို့သည် မြန်မာနိုင်ငံ၏ တန်ဖိုးမြင့် တွင်းထွက်သယံဇာတဖြစ်သော ကျောက်စိမ်းအဓိကထွက်ရှိရာ ဒေသဖြစ်သည်။

နိုင်ငံ၏ တန်ဖိုးအမြင့်ဆုံး တွင်းထွက်သယံဇာတဖြစ်သည့် ကချင်ပြည်နယ်မှ ကျောက်စိမ်းကို တရုတ်သို့ နှစ်စဉ်တင်ပို့ရောင်းချလျက်ရှိပြီး တရားမ၀င်လမ်းကြောင်းမှ အများဆုံး တင်ပို့ရောင်းချနေသော ပမာဏကို ထိန်းချုပ်ရန် အစိုးရက မျက်ကွယ်ပြုထားဆဲဖြစ်သည်ဟု နိုင်ငံတကာမှ စောင့်ကြည့်လေ့လာသူများ၏ ဝေဖန်ထောက်ပြမှုကို မပြတ်ခံနေရသည်။

‘‘အဲဒီဒေသမှာ စစ်တပ်က သယံဇာတနဲ့ပတ်သက်ပြီး တရားမ၀င်လမ်းကြောင်း တင်ပို့မှုတွေကနေ အကျိုးအမြတ် အများကြီးရထားတာတွေရှိတယ်’’ဟု မြန်မာနိုင်ငံ၏ သယံဇာတအကြောင်းများကို နှစ်ပေါင်းများစွာ လေ့လာခဲ့ပြီး သုတေသနလုပ်ဆောင်နေသူ ပြင်သစ်လူမျိုးတစ်ဦးကဆိုသည်။

တရားမ၀င်နှင့် တရားဝင်တင်ပို့သည့် ကုန်သွယ်မှုလမ်းကြောင်း နှစ်ခုပေါင်းမည်ဆိုပါက ကန်ဒေါ်လာ ၈ ဘီလီယံမှ ၉ ဘီလီယံအထိရှိနိုင်ပြီး တိကျသေချာသည့် စစ်တမ်းကိုမူ မလုပ်ဆောင်နိုင်သေးကြောင်း အထက်ပါ သုတေသနလုပ်ဆောင်နေသူက ခန့်မှန်းပြောဆိုသည်။

နှစ်စဉ် နေပြည်တော်တွင် သုံးကြိမ်ထက်မနည်း ပြုလုပ်လေ့ရှိသည့် ကျောက်စိမ်းပြပွဲမှရရှိသည့် အခွန်ပမာဏနှင့် ကျောက်စိမ်းအရေအတွက်ကို အစိုးရက ထုတ်ပြန်ပြောဆိုလေ့ရှိသော်လည်း တရားမ၀င်လမ်းကြောင်းများမှ အများဆုံးထွက်ရှိသည့် ကျောက်စိမ်းအရေအတွက်မှာ ကိန်းဂဏန်းများမရှိဘဲ နိုင်ငံတော်၏ အခွန်များစွာဆုံးရှုံးနေရကြောင်း မြန်မာနိုင်ငံ သဘာဝသယံဇာတအရင်းအမြစ် တူးဖော်ထုတ်လုပ်ရေးလုပ်ငန်းများ ပွင့်လင်းမြင်သာမှု ဆောင်ရွက်ရေးအဖွဲ့အစည်းတစ်ခုဖြစ်သည့် MEITI ညှိနှိုင်းရေးမှူးရုံးမှ တာဝန်ရှိသူတစ်ဦးကဆိုသည်။

တရားမ၀င်လမ်းကြောင်းများမှ ကျောက်စိမ်းများ တင်ပို့ရောင်းချနေရခြင်းမှာ အစိုးရ၏ တိကျသေချာခိုင်မာသည့် ဥပဒေပိုင်းအားနည်းခြင်း၊ အခွန်ဆောင်ရသည်မှာ ပိုမိုများပြားနေခြင်းတို့ကြောင့် နှစ်စဉ်တရားမ၀င်လမ်းကြောင်းမှ တင်ပို့နေရသည်ဟု လုပ်ငန်းရှင်အချို့က ပြစ်တင်ပြောကြားလေ့ရှိသည်။

‘‘တရားဝင်လမ်းကြောင်းကပို့ရင် အခွန်ကအရမ်းများတယ်။ ဒါကြောင့် အများစုက ဘလက်လမ်းကြောင်းကပဲ ပို့ကြတယ်’’ဟု JADE & Garden ကုမ္ပဏီမန်နေဂျင်းဒါရိုက်တာ ဦးစိုးမြင့်နိုင်ကဆိုသည်။

၁၉၈၀ ပြည့်နှစ်မှစတင်၍ ပုဂ္ဂလိတူးဖော်ရေးလုပ်ငန်းများကို ခွင့်ပြုပေးခဲ့သည့် မြန်မာ့ကျောက်စိမ်းလုပ်ငန်းသည် အမေရိကန်၏စီးပွားရေးအရ ပိတ်ဆို့အရေးယူထားမှုများကြောင့် တရုတ်နိုင်ငံသို့သာ အဓိကတင်ပို့နေရပြီး နိုင်ငံမှထွက်ရှိသည့် ကျောက်စိမ်း ၉၀ ရာခိုင်နှုန်းက တရုတ်နိုင်ငံသို့ အမြောက်အမြား စီးဝင်နေကြောင်း ကမ္ဘာကျော်မက်ကင်ဆေးတက္ကသိုလ်၏ သုတေသနပြုထားချက်ကို နယူးယောက်တိုင်းမ်သတင်းစာက ကိုးကားရေးသားထားသည်။

ဈေးကွက်တွင်လည်း လုပ်ငန်းရှင်အများစု၏ဆန္ဒမှာ ကျောက်စိမ်းသည် တရုတ်နိုင်ငံတွင်သာ ဈေးကွက်ဖြစ်ပေါ်နေပြီး လက်ရှိ အမေရိကန်၏ စီးပွားရေးပိတ်ဆို့ထားမှုမှာ သက်ရောက်မှုမရှိဟု ဆိုကြသည်။

တရုတ်လူမျိုးအများစု ကြိုက်နှစ်သက်သည့် ကျောက်စိမ်းသည် ပုံမှန်ဈေးကွက်ရှိသောကြောင့် အမေရိကန်၏ စီးပွားရေးပိတ်ဆို့မှုက ပြည်တွင်းလုပ်ငန်းကို အဟန့်အတားမဖြစ်နိုင်ဟု မြန်မာနိုင်ငံ ကျောက်မျက်ရတနာလုပ်ငန်းရှင်များအသင်း အတွင်းရေးမှူး ဦးထွန်းလှအောင်က ပြောသည်။

တရားမ၀င်လမ်းကြောင်းများ အားကောင်းနေရခြင်းမှာ တူးဖော်သည့် နေရာတွင်ရှိသော ရာဖြတ်အခွန်ကောက်သည့် သတ္တုတွင်းဝန်ထမ်းများက တူးဖော်သူများနှင့်ပူးပေါင်းပြီး အဂတိလိုက်စားနေသည်မှစတင်ကာ တရားမ၀င် လမ်းကြောင်းအတိုင်း တင်ပို့နေခြင်းဖြစ်သည်ဟု ပြည်တွင်းအခြေစိုက် NGO အဖွဲ့ NRGI မှ မက်သရူးဆော်လမွန်ကပြောသည်။

မြေအောက်မှသည် တွင်းထိပ်သို့ စတင်တူးဖော်စဉ်မှ တင်ပို့ရောင်းချသည်အထိ အဆက်မပြတ်စီမံခန့်ခွဲသည့်စနစ်မှာ အစိုးရတွင် များစွာအားနည်းနေကြောင်း မက်သရူးဆော်လမွန်က ထောက်ပြသည်။

ထို့ပြင် တရားမ၀င်လမ်းကြောင်းမှတစ်ဆင့် ကျောက်စိမ်းကိုတင်ပို့ရန် တွန်းအားပေးစေသည့် အချက်တစ်ချက်မှာ ကာလရှည် ပြည်တွင်းစစ်တစ်ခုဖြစ်သည့် သုံးနှစ်ကျော်ကြာ မြန်မာစစ်တပ်နှင့် ကချင်လွတ်မြောက်ရေးတပ်မတော်တို့အကြား တိုက်ပွဲများကြောင့်လည်းဖြစ်သည်။

‘‘ကျောက်စိမ်းလုပ်ကွက်က သတ္တုတွင်းကို အခွန်ပေးရတယ်။ ကေအိုင်အေကလည်း မကြာမကြာ ဆက်ကြေးသဘောမျိုး လာကောက်တာတွေရှိတော့ လုပ်ငန်းရှင်တွေအတွက် ကုန်ကျစရိတ်ပိုများတော့ လွယ်လွယ်နဲ့ ပို့လို့ရတဲ့ တရားမ၀င် လမ်းကြောင်းကို အများဆုံး ရွေးချယ်ကြတယ်’’ဟု မြစ်ကြီးနားကျောက်မျက်ရတနာလုပ်ငန်းရှင်များအသင်း အတွင်းရေးမှူး ဦးလာခရီလာအောင်က ပြောသည်။

တရားမ၀င်လမ်းကြောင်းကို အစိုးရက ထိန်းချုပ်ဟန့်တားလိုက်ပါက ၎င်းတို့ပိုင်ကုမ္ပဏီများ၊ ၎င်းတို့နှင့်နီးစပ်သူ ကုမ္ပဏီများ၏ အကျိုးစီးပွားကို ထိခိုက်ဖွယ်ရှိသောကြောင့် ယနေ့တိုင် ထိထိရောက်ရောက် ဟန့်တားမှုမပြုလုပ်ခြင်းဖြစ်ကြောင်း ဖားကန့်မြို့နယ်မှ အမည်မဖော်လိုသူ ကျောက်စိမ်းတူးဖော်ရေး လုပ်ငန်းရှင်တစ်ဦးက ပြောသည်။

ထို့ပြင် စစ်တပ်နှင့် ကချင်လွတ်မြောက်ရေးတပ်မတော်တို့က တရားမ၀င်လမ်းကြောင်းမှ တင်ပို့နေသူများကို အခကြေးငွေယူလုံခြုံရေးပေးလုပ်ဆောင်နေခြင်းကြောင့် တရားမ၀င်တင်ပို့မှု ရပ်ဆိုင်းသွားမည်ကို ၎င်းတို့ကမလိုလားကြောင်း အထက်ပါလုပ်ငန်းရှင်ကဆိုသည်။

သဘာဝဓာတ်ငွေ့ပြီးပါက နိုင်ငံ၏ ပို့ကုန်ကဏ္ဍတွင် ဒုတိယအဆင့်တွင်ရှိသည့် ကျောက်စိမ်းသည် တူးဖော်ရေးအဆင့်မှာပင် အိမ်နီးချင်းတရုတ်သို့ အရိုင်းအဆင့်ဖြင့် တင်ပို့နေခြင်းကို အစိုးရကမလိုလားဘဲ အချောထည်အဆင့်ဖြင့် တင်ပို့ရန် ပြုပြင်ပြောင်းလဲမှုများ ပြုလုပ်နေပြီဟု သတ္တုတွင်းဝန်ကြီးဌာနက မကြာခဏ ပြောကြားလေ့ရှိသည်။

သို့သော် ကျောက်စိမ်းအရိုင်းတုံးများ နှစ်စဉ် တရားမ၀င် တင်ပို့ရောင်းချနေမှုကို ထိထိရောက်ရောက် ဟန့်တားရန် မူဝါဒများ လျင်မြန်စွာချမှတ်ရန် ၀န်ကြီးဌာနက နှောင့်နှေးနေဆဲဖြစ်သည်။

ထို့ကြောင့် အစိုးရအပါအ၀င် ထိပ်ပိုင်းစီးပွားရေးလုပ်ငန်းရှင်များ၊ တိုင်းရင်းသားလက်နက်ကိုင်များ၏ အကျိုးစီးပွားအငြင်းပွားမှု၊ မသမာမှုများအကြား ကချင်ပြည်နယ်မှ ကမ္ဘာကျော် ကျောက်စိမ်းတုံးများသည် အစိုးရ၏ စီမံခန့်ခွဲမှုအလွဲနှင့် လျစ်လျူရှုမှုများထဲတွင် ပျောက်ကွယ်သွားနိုင်သည့် အနေအထားရှိနေပြီဖြစ်သည်။