အစိုးရလုပ်ရပ်သည် တိုင်းရင်းသားများ၏ ယုံကြည်မှုကို ပျက်ပြားစေသည်ဟု UNA ခေါင်းဆောင်များ ပြော

အစိုးရလုပ်ရပ်သည် တိုင်းရင်းသားများ၏ ယုံကြည်မှုကို ပျက်ပြားစေသည်ဟု UNA ခေါင်းဆောင်များ ပြော

မောင်ရမ္မာ (နိရဉ္စရာ)၊ January 22, 2013 at 12:10 pm

မြန်မာနိုင်ငံတွင် ဖြစ်ပေါ်နေသော ပြည်တွင်းစစ်အပေါ် အစိုးရ၏ ကိုင်တွယ်ဖြေရှင်းနေမှုသည် တိုင်းရင်းသားများ၏ ယုံကြည်မှုကို ပျက်ပြားစေသည်ဟု ညီညွတ်သော တိုင်းရင်းသားလူမျိုးများ မဟာမိတ်အဖွဲ့ (United Nationalities Alliance - UNA) က ပြောဆိုလိုက်သည်။

ရန်ကုန်မြို့ Centre Hotel တွင် ဇန္န၀ါရီလ ၂၀ ရက်နေ့က ညီညွတ်သော တိုင်းရင်းသားလူမျိုးများ မဟာမိတ်အဖွဲ့ UNA နှင့် ဂျပန်ဒီမိုကရက်တစ်ပါတီ အောက်လွှတ်တော်အမတ် Mr Masaharu Nakagawa (Acting Secretary General of the DPJ and Mr Michihiro Ishibashi DPJ) တို့ တွေ့ဆုံစဉ် ပြောကြားလိုက်ခြင်းဖြစ်သည်။

ဆွေးနွေးပွဲတွင် မြန်မာနိုင်ငံ၌ ဖြစ်ပွားနေသော ပြည်တွင်းစစ်ရပ်စဲရေးနှင့် ပြည်တွင်းငြိမ်းချမ်းရေးကို ဖော်ဆောင်ရန် တိုင်းရင်းသားများနှင့် အစိုးရအကြား ဂျပန်အနေဖြင့် ၀ိုင်းဝန်းပါဝင်ကူညီရန် သဘောထားများကို ဂျပန် အောက်လွှတ်တော်အမတ်က ပြောဆိုခဲ့ဟု သိရသည်။

ညီညွတ်သော တိုင်းရင်းသားလူမျိုးများ မဟာမိတ်အဖွဲ့ (UNA) ၏ သဘောထားတုံ့ပြန်ပြောဆိုချက်နှင့် ပတ်သက်ပြီး ဆွေးပွေဲတွင် ကိုယ်တိုင်တက်ရောက်ခဲ့သူ ရခိုင်ဒီမိုကရေစီအဖွဲ့ချုပ် ALD ပါတီ ဥက္ကဌ ဦးအေးသာအောင်က နိရဉ္စရာသို့ ယခုလို ပြောသည်။

“ဒီနေ့ ပြည်တွင်းစစ် ရပ်စဲဖို့ ကိစ္စမှာ ပြည်တွင်းစစ်ကို တိုင်းရင်းသားတွေက အမြန်ဆုံး ရပ်စဲချင်ပေမယ့် အခု အစိုးရက လုပ်နေတဲ့ပုံစံတွေဟာ တိုင်းရင်းသားတွေရဲ့ ယုံကြည်မှုကို ပျက်ပြားစေတဲ့အကြောင်းကို ပြောပြတယ်။ ဘာဖြစ်လို့လဲဆိုတော့ ကရင်အပါအ၀င် တခြားတိုင်းရင်းသားအဖွဲ့အစည်းတွေနဲ့ ဆွေးနွေးညှိနှိုင်း သဘောတူညီချက်တွေ ရယူထားပေမယ့် KIO နဲ့ အခုအချိန်ထိ တိုက်ပွဲတွေ အပြင်းအထန်ဖြစ်နေတယ်။ လေယာဉ်တောင်မှ ဂျက်လေယာဉ်တွေနဲ့ တိုက်နေတဲ့ တိုက်ပွဲအတွက် ကျနော်တို့ စိုးရိမ်တဲ့အကြောင်း၊ ဒါကြောင့် ငြိမ်းချမ်းရေးရဖို့အတွက် ဂျပန်နိုင်ငံအပါအ၀င် အမေရိကတို့က ၀င်ပြီးတော့ အစိုးရကို တတ်နိုင်သလောက် ဆောင်ရွက်ပေးဖို့အကြောင်း၊ တကယ်လို့ အစိုးရနဲ့ နိုင်ငံတကာအဖွဲ့အစည်းတွေနဲ့ ဆွေးနွေးတဲ့အခါမှာလည်း ကြားနိုင်ငံ ကြားအဖွဲ့အစည်းတွေ လိုအပ်တဲ့အကြောင်းတွေကို ဆွေးနွေးကြပါတယ်။”

ဂျပန်အစိုးရအနေဖြင့် ပြည်ပတိုင်းရင်းသားအဖွဲ့အစည်းများကို ကူညီသကဲ့သို့ ပြည်တွင်းတိုင်းရင်းသားပါတီအဖွဲ့အစည်းများနှင့်လည်း ပူးပေါင်းဆောင်ရွက်သွားမည့် ကိစ္စရပ်များကို ဂျပန်အမတ်က ပြောကြားခဲ့သည်ဟု ဦးအေးသာအောင်က ပြောသည်။

“ဂျပန်နိုင်ငံအနေနဲ့ တိုင်းရင်းသားနိုင်ငံရေးပါတီတွေကိုလည်း ဆက်သွယ်ပြီးတော့ ပြည်ပမှာရှိတဲ့ UNFC ကိုလည်း ဆက်သွယ်တယ်။ အကူအညီတွေ ပေးတယ်။ အဲဒီလိုပဲ ပြည်တွင်းထဲမှာရှိတဲ့ တိုင်းရင်းသားနိုင်ငံရေးပါတီတွေနဲ့ ဆက်သွယ်ပြီးတော့ နှီးနှောဖလှယ်တာတွေ၊ ပြည်တွင်းစစ်ရပ်ဖို့၊ ပြည်တွင်းငြိမ်းချမ်းရေးကို ဖော်ဆောင်ဖို့ ကိစ္စတွေမှာ အပြန်အလှန် ပူးပေါင်းဆောင်ရွက်ဖို့ ကိစ္စတွေကို ဂျပန်က ပြောပါတယ်။”

မြန်မာနိုင်ငံအတွင်း ပြည်တွင်းစစ်ရပ်စဲရေးနှင့် ပြည်တွင်းငြိမ်းချမ်းရေးအတွက် တိုင်းရင်းသားများမဟာမိတ်အဖွဲ့ (UNA) နှင့် ဂျပန်နိုင်ငံအကြား သဘောတူညီမှု ရရှိခဲ့သည်ဟု ဦးအေးသာအောင်က ပြောသည်။

ဆွေးနွေးပွဲကို တိုင်းရင်းသားများမဟာမိတ်အဖွဲ့ (UNA) မှ ရခိုင်ဒီမိုကရေစီအဖွဲ့ချုပ် (ALD) ပါတီဥက္ကဌ ဦးအေးသာအောင်၊ ရှမ်းတိုင်းရင်းသားများဒီမိုကရေစီအဖွဲ့ချုပ် (SNLD) ဥက္ကဌ ဦးခွန်ထွန်းဦး အပါအ၀င် တခြား ကချင်၊ ကရင်၊ မွန်၊ ချင်း စသော တိုင်းရင်းသားပါတီများမှ ကိုယ်စားလှယ်များ တက်ရောက်ခဲ့သည်ဟု သိရသည်။

Democratic Party of Japan (DPJ) လွှတ်တော်အမတ် Mr. Nakagawa သည် ဂျပန်ရောက် မြန်မာတိုင်းရင်းသားများနှင့်လည်း ရင်းနှီးချစ်ခင်စွာ မြန်မာ့အရေးများကို ပူးပေါင်းဆောင်ရွက်နေသူ ဖြစ်သည်ဟု သိရသည်။

ညီညွတ်သော တိုင်းရင်းသားလူမျိုးများ မဟာမိတ်အဖွဲ့ (UNA) ကို ပြည်တွင်းစစ်ရပ်စဲရေး၊ ပြည်တွင်းငြိမ်းချမ်းရေး ဖော်ဆောင်ရေးနှင့် တိုင်းရင်းသားများ တန်းတူအခွင့်အရေး ရရှိသော စစ်မှန်သည့် ပြည်ထောင်စု ဖြစ်ထွန်းလာရေးကို လုပ်ဆောင်သွားရန်အတွက် ရှမ်းတိုင်းရင်းသားများဒီမိုကရေစီအဖွဲ့ချုပ်၊ ရခိုင်ဒီမိုကရေစီအဖွဲ့ချုပ်၊ မွန်ဒီမိုကရေစီပါတီ၊ ဇိုမီး ဒီမိုကရေစီအဖွဲ့ချုပ်၊ ရှမ်းပြည်နယ် ကိုးကန့်ဒီမိုကရက်တစ်ပါတီ၊ ကချင်အမျိုးသားဒီမိုကရေစီပါတီနှင့် ကရင်အမျိုးသားဒီမိုကရေစီပါတီတို့ ပါဝင်သည်ဟု သိရသည်။