လမ်း

လမ်း

ပိုင်စိုးဝေ

လမ်းပျောက်ခြင်းအကြောင်း

လမ်းလျှောက်ရင်း စဉ်းစား

စဉ်းစားရင်း လမ်းလျှောက်

လမ်းပျောက်ခဲ့ အကြိမ်ကြိမ်။

ဟောဒီလမ်းဟာ

တနေရာရာကို ရောက်မယ့်

လမ်းတလမ်း ဖြစ်ချင်ဖြစ်မယ်

ဘယ်ကိုမှ မရောက်တဲ့

လမ်းတလမ်းလည်း ဖြစ်နိုင်ရဲ့။

ဆက်သွား ဆက်သွား

ကိုယ့်ကို မျှော်လင့်နေသူတွေနဲ့

အထိတ်တလန့် ပြက်လုံးတွေရှိရာ

ဆက်သွား။

စိတ်၊ စေတသိက်ရယ်

မြဲမြဲဆုပ်ထား

ပြုတ်ကျသွားမယ်နော်

ဘ၀တွေကို သယ်ဆောင်ခဲ့တဲ့ ဘတ်စကား

မှတ်တိုင်များစွာ လွန်မြောက်ခဲ့။

ခရီးဆုံးဘူတာ နီးပြီလား

နီးပြီလား ... နီးပြီလား

နာရီများ ပြောင်းပြန်လည်နေရဲ့။ ။

ပိုင်စိုးဝေ

(မြားနတ်မောင်မင်္ဂလာမဂ္ဂဇင်း၊ ဧပြီလ၊ ၁၉၉၇ ခုနှစ်)