မင်္ဂလာပါဗျာ …
ကျနော်ကတော့ ကိုရီးယားနိုင်ငံမှာ အလုပ်သမားအဖြစ် လာရောက် အလုပ်လုပ်ကိုင်နေတဲ့ မောင်နေရောင်လို့ ခေါ်ပါတယ်။ ကိုရီးယားနိုင်ငံမှာ အလုပ်လုပ်နေတာ (၅) လလောက်ရှိပါပြီ။ လုပ်ရတဲ့ အလုပ်ကတော့ ဓာတု ဗေဒအရည်များကို အသုံးပြုကာ အ၀တ်စရှည်များကို ဆေးကြောရပါတယ်ခင်ဗျာ။ လစာကတော့ အခြေခံလ စာ ၀မ် (၉) သိန်းလောက် ရပါတယ်။ လက်အိတ်နဲ့ ခြေအိတ်များ ပေးသော်လည်း ကြာတော့ လက်များ၊ ခြေ ထောက်များမှာ ပေါက်ပြဲလာပါတယ်။ မျက်နှာများမှာလည်း အဖုများပေါက်လာပါတယ်။ ရတဲ့လစာမှာ ငွေဈေး ကြောင့် ထင်သလောက်မဖြစ်သလို အစားအသောက်မှာလည်း ကင်မချီဟင်းရည်သာ စားရပေမယ့် မြန်မာနိုင် ငံထက်သာတယ်ဆိုပြီး သည်းခံလုပ်ပါတယ်။ သို့သော် အလုပ်ရှင်မှ စိတ်တိုင်းမကျတိုင်း ဆဲဆို၊ မြန်မာနိုင်ငံကို ပြန်ပို့မယ်ဆိုတဲ့ ခြိမ်းခြောက်မှုကို အမြဲခံရပါတယ်။
မေလရဲ့ တနင်္ဂနွေတရက်မှာ မြန်မာလူမျိုးများ အမြဲဆုံနေကျ အင်ချွန်မြို့တော်ရဲ့ ဘူဗြောင်းမြို့ရှိ ဘုန်းကြီး ကျောင်းမှာ အလုပ်သမားတွေ ဆုံဖြစ်ကြတဲ့အခါ အခက်အခဲများကို အချင်းချင်းပြောကြရင်း လွန်ခဲ့တဲ့ (၂) နှစ် လောက်က ရောက်နေခဲ့တဲ့ မြန်မာအစ်ကိုများက အခက်အခဲရှိက သံရုံးသို့ အကြောင်းကြားပါက အကူအညီ ပေးကြောင်း၊ ထိုအထဲမှ တယောက်မှာ မိမိတို့အား အလုပ်ပြောင်းရန် ကူညီပေးသည့်အပြင် သံရုံးမှ အလုပ်သ မားဝန်ကြီးဌာနအထိ ကားဖြင့် လိုက်ပို့ကာ အလုပ်ရှာပေးခဲ့ကြောင်း ပြောသဖြင့် အလွန်ပဲ ၀မ်းသာခဲ့ရပါတယ်။
တနင်္လာနေ့ မနက်စောစော သံရုံးကို ဖုန်းဆက်လိုက်တဲ့အခါ အရင်က အကူအညီပေးသော်လည်း အခုအခါ အလုပ်သမားဝန်ကြီးဌာနမှ တာဝန်ခံ ရောက်ရှိနေကြောင်း၊ ထိုအမျိုးသမီးဆီ ဖုန်းဆက် အကူအညီတောင်းပါ က ကူညီမှာဖြစ်ကြောင်း ပြောပြတဲ့အတွက် ထိုဖုန်းနံပါတ်ကို ဆက်ခဲ့ပါတယ်။ ဖုန်းဆက်လိုက်တဲ့အခါ ထိုအမျိုး သမီး ပထမဆုံး ပြောတဲ့စကားကတော့ အလုပ်ပြောင်းလို့မရကြောင်း၊ အလုပ်ပြောင်းခြင်းကို မြန်မာနိုင်ငံမှ လူ ကြီးများက မနှစ်သက်ကြောင်း၊ စာချုပ်သက်တမ်း မပြည့်ခင် မြန်မာနိုင်ငံ ပြန်ပါကလည်း ပြန်ရောက်ပါက မြန် မာအလုပ်သမားဝန်ကြီးဌာနကို ကျပ်သိန်း (၃၀) ပေးလျော်နေရမည်ဖြစ်ကြောင်း ပြောပါတယ်။
အခုအခါ အလုပ်အဆင်မပြေတဲ့အတွက် မြန်မာနိုင်ငံကို ပြန်ချင်သော်လည်း သိန်း (၃၀) ပေးလျော်ရမည်ကို မြန်မာအလုပ်သမားများ အလွန်ပဲ ကြောက်ရွံ့နေကြပါတယ်။ အရင်ရောက်နေတဲ့ အစ်ကိုတွေ ပြောသလို သံ ရုံးကလည်း မကူညီ၊ တာဝန်ခံ အလုပ်သမားအရာရှိ မမကလည်း ခြိမ်းခြောက်နဲ့ ကျနော်တို့ မြန်မာများ ဒုက္ခ ရောက်နေတဲ့အတွက် သက်ဆိုင်ရာ တာဝန်ရှိသူများမှ ကူညီဖြေရှင်းပေးစေလိုပါတယ်ခင်ဗျာ။
လေးစားစွာဖြင့် …
မြန်မာအလုပ်သမားများကိုယ်စား
မောင်နေရောင်
Posts
No comments:
Post a Comment