နေပြည်တော် ဟာသများ (၄)

ကျယ်လိုက်တဲ့ ပါးစပ်တွေ

ကြပ်ပြေး-ကြမ်းပိုး

အခုကျင်းပနေတဲ့ လွှတ်တော်ကြီးမှာ အမတ်တွေ ဆွေးနွေးကြပုံကို မိတ်ဆွေတယောက် မှတ်ချက်ချပုံက ဒီလို ပါ။

“ဒီမိုကရေစီပြည့်ဝတဲ့ လွှတ်တော်ကြီး ကျင်းပနေပြီဆိုတော့ လွှတ်တော်အမတ်တွေ အာပေါင်အာရင်းသန်သန် နဲ့ ပါးစပ်မပိတ်တမ်း ဆွေးနွေးကြမယ်ထင်ထားတာ။ အခုတော့ ပြိတ္တာပါးစပ်တွေကို အပ်ချည်နဲ့ ချုပ်ထားလား မှတ်ရ” ... တဲ့။

ဒီလောက် အပြောကောင်းပုံထောက်ရင် ဒီလူ ‘လှတောသား’ ဖြစ်ရမယ်။

လွှတ်တော်ကို တနေ့ (၁ဝ) မိနစ်သာ ကျင်းပရခြင်းအကြောင်း

လွှတ်တော်ကို တနေ့ (၁ဝ) မိနစ်စီလောက်ပဲ ကျင်းပတာနဲ့ ပတ်သက်လို့ မလိုသူတွေက အမျိုးမျိုး ဝေဖန်ကြ တယ်။ တကယ်တော့ ဒါက ဗိုလ်ချုပ်မှူးကြီးရဲ့ စေတနာပါ။

ဗိုလ်ချုပ်မှူးကြီးက သူ့လွှတ်တော်အမတ်တွေကို ကမ္ဘာပေါ်မှာ လုပ်အားခ အများဆုံး ရစေချင်တယ်လေ။ တ ချို့နိုင်ငံတွေမှာ အမတ်တွေရဲ့ လခက တနာရီကို ဒေါ်လာ (၅ဝ) နှုန်းလောက် ရတယ်ဆိုလား။ အခု သူပေး နိုင်တာက တရက်မှ ကျပ်တသောင်းလောက်ဆိုတော့၊ အခုလို တရက်ကို ဆယ်မိနစ်ထက်ပိုပြီး မကျင်းပရလို့ ကန့်သတ်လိုက်ရတာပါတဲ့။ ဒါမှ တနာရီနှုန်းနဲ့ တွက်ရင် ခြောက်သောင်းလောက်ရပြီး ကမ္ဘာပေါ်မှာ လုပ်အားခ အများဆုံးရတဲ့ လွှတ်တော်အမတ်တွေ ဖြစ်အောင်လို့ပါတဲ့။

ကြပ်ပြေး-ကြမ်းပိုး