Monday, January 25, 2016

ဗိုလ်ချုပ်မှူးကြီးဟောင်း ဦးသန်းရွှေနဲ့ စစ်ခေါင်းဆောင်များသို့ ပေါ့ပေါ့ပါးပါး အကြံပြုချက်

ပြည်သူလူထုအပေါ် အပြစ်ကျူးလွန်ခဲ့သူတွေလို့ ကိုယ့်ကိုယ်ကိုယ် ခံယူထားလို့ ၂၀၀၈ ဖွဲ့စည်းပုံအခြေခံဥပဒေထဲမှာတောင် နောက်ကြောင်းပြန် အရေးမယူဖို့ ဇွတ်အတင်း ရေးဆွဲပြဌာန်းခဲ့တဲ့ ဗိုလ်ချုပ်မှူးကြီးဟောင်း ဦးသန်းရွှေနဲ့ အပေါင်းအပါ စစ်ခေါင်းဆောင်တွေအားလုံးကို ကျနော့်အနေနဲ့ စေတနာရှေ့ထား အကြံပြုချင်တာလေး ရှိပါတယ်။ ပြစ်မှုကျူးလွန်ခဲ့တဲ့ စစ်ခေါင်းဆောင်တွေအားလုံး အသေဖြောင့်ပြီး ကျန်ခဲ့မယ့် သားစဉ်မြေးဆက်တွေရဲ့ နောင်ရေးအတွက်လည်း စိတ်အေးရအောင်၊ တိုင်းပြည်မှာ ဖြစ်ပွားနေတဲ့ ပြဿနာအရပ်ရပ်ကိုလည်း ညင်ညင်သာသာ ဖြေရှင်းနိုင်ပြီး တိုင်းရင်းသားပြည်သူတွေအားလုံး ကောင်းမွန်တဲ့ အနာဂတ်ဆီကို ညီတူညာတူ ချီတက်နိုင်အောင်လို့ပါ။

အကြံပြုချင်တာကတော့ ၂၀၁၅ ရွေးကောက်ပွဲအနိုင်ရ NLD ပါတီဥက္ကဌ ဒေါ်အောင်ဆန်းစုကြည် လူထုနဲ့ သူ့ပါတီကို မီးသေအောင်လုပ်နိုင်တဲ့ သြဇာအရှိန်အ၀ါနဲ့ အာဏာပါဝါလေးရှိတုန်း တနည်းပြောရရင် ဟောက်အား၊ ငေါက်အားလေးရှိတုန်း လာမယ့် NLD စစ်တပိုင်းအစိုးရလက်ထက်မှာ ပြစ်မှုကျူးလွန်ခဲ့တဲ့ စစ်ခေါင်းဆောင်တွေအားလုံး အလွန်ချိုသာမယ့်ဈေးနှုန်းနဲ့ အရေးယူ အပြစ်ပေးတာကို ခပ်မြန်မြန် ခံယူလိုက်စေချင်တာပါပဲ။ အမျိုးသားပြန်လည်ရင်ကြားစေ့ချင်ဇောကြီးနေတဲ့ ဒေါ်အောင်ဆန်းစုကြည်ရဲ့ စိတ်စေတနာအရဆို သစ်ခိုးထုတ်တဲ့ တရုတ်သစ်ခုတ်သမားတွေကို ဦးသိန်းစိန် ပြန်လွှတ်ပေးလိုက်သလိုတောင် စစ်ခေါင်းဆောင်တွေ ကံကောင်းနိုင်ပါတယ်။

အဲဒီလို စံနမူနာပြ အပြစ်ပေး အရေးယူခံပြီးလို့ အပြစ်တွေ ဆေးကြောပြီးသွားတဲ့အခါမှာ ပြည်သူလူထုကို ၀န်ချတောင်းပန်၊ မတော်မတရား ပိုင်ဆိုင်ထားတာတွေကို NLD စစ်တပိုင်းအစိုးရ ခွင့်ပြုသလောက် ယူပြီး ကျန်တာကို ပြည်သူ့ဘဏ္ဍာအဖြစ် ပြန်အပ်လိုက်မယ်ဆိုရင် NLD စစ်တပိုင်းအစိုးရလက်ထက်မှာ တရားဥပဒေစိုးမိုးရေးကိစ္စ ဆောင်ရွက်ရတာလည်း အဆင်ပြေ၊ ဒေါ်အောင်ဆန်းစုကြည် တဖွဖွပြောနေတဲ့ အမျိုးသားပြန်လည်ရင်ကြားစေ့ရေးကိစ္စ အကောင်အထည်ဖော်ရတာလည်း အဆင်ပြေ၊ စစ်ခေါင်းဆောင်တွေအားလုံးလည်း အသေဖြောင့်ပြီး သားစဉ်မြေးဆက်တွေရဲ့ နောင်ရေးအတွက်ပါ စိတ်အေးနိုင်မှာဖြစ်ပါတယ်။

အဲ့ဒါအပြင် စစ်တပ်ကို စစ်တပ်လျားဆီ ပြန်ပို့ရမယ့်ကိစ္စ၊ ပြည်တွင်းငြိမ်းချမ်းရေးကြိုးပမ်းမှုကိစ္စတွေကို ဆောင်ရွက်ရာမှာ NLD စစ်တပိုင်းအစိုးရအဖွဲ့အတွက် ပိုမိုလွယ်ကူချောမွေ့စေပြီး ဖက်ဒရယ်ပြည်ထောင်စု ဖွဲ့စည်းပုံအခြေခံဥပဒေသစ် ရေးဆွဲပြဌာန်းရေးအတွက်လည်း လမ်းပွင့်သွားစေမယ်လို့ ထင်ပါတယ်။

အဲဒါဆိုရင် တိုင်းသူပြည်သားတွေလည်း ၀မ်းသာ၊ စစ်ခေါင်းဆောင်တွေအားလုံးလည်း လန်းဖြာပြီး စစ်ခေါင်းဆောင်တွေအနေနဲ့ မသေခင် လူတောသူတောထဲမှာ စိုးရိမ်ကြောင့်ကြမှုကင်းစွာ လူပီပီသသ ပျော်ပျော်ရွှင်ရွှင် နေထိုင်သွားလာနိုင်ကြမှာဖြစ်ပါတယ်။ အဲဒီအတွက် ဒေါ်အောင်ဆန်းစုကြည်နဲ့ ညှိနှိုင်းကာ လာမယ့် စစ်တပိုင်းလွှတ်တော်သစ်မှာ ၂၀၀၈ ဖွဲ့စည်းပုံထဲက ပြင်သင့်တာတွေကို ပြင်ဆင်ပြီး NLD စစ်တပိုင်းအစိုးရလက်ထက်မှာ အရေးယူ အပြစ်ပေးတာကို ခပ်မြန်မြန်ခံယူကြဖို့ စေတနာရှေ့ထား အကြံပြုလိုက်ရပါတယ်။

အားလုံးသို့ လေးစားစွာဖြင့် …

ဒေါက်တာလွဏ်းဆွေ
နံနက် ၁၀း၂၅ နာရီ
၂၅ ဇန်န၀ါရီ ၂၀၁၆

No comments: