Monday, November 9, 2015

ရွေးကောက်ပွဲကော်မရှင် ဘယ်လိုမျက်လှည့်ပြနိုင်သလဲ

ရွေးကောက်ပွဲကော်မရှင်အနေနဲ့ ရွေးကောက်ပွဲရလဒ်ကို စောနိုင်သမျှ စောစီးစွာ မကြေညာဘဲ အချိန်ဆွဲနေတဲ့အပေါ် ကျနော် စဉ်းစားမိတဲ့အချက်က မြို့နယ်တိုင်းမှာ ကြိုတင်မဲရောပြီး၊ မဲရေတွက်ပြီးလို့ အနိုင်အရှုံးစာရင်းကို အကြမ်းဖျင်း သိရပြီးနောက်ပိုင်း ကိုတင်အေးတို့ကော်မရှင် မျက်လှည့်ပြနိုင်တဲ့အကွက်ပါ။ ဘယ်လိုအကွက်လဲဆိုတော့ …

(၁) ပထမအချက်အနေနဲ့ မြို့နယ်တွေမှာ မဲရေတွက်ပြီးသော်ငြား ရေတွက်ပြီးသား မဲပုံးတွေကို လေ့လာစောင့်ကြည့်သူတွေ၊ ပြည်သူတွေက သိမ်းဆည်းခွင့်ရတာမဟုတ်ဘဲ ကော်မရှင်လက်ထဲမှာသာ သိမ်းဆည်းထားတယ်ဆိုတာကို မမေ့ဖို့ လိုပါတယ်။ လေ့လာစောင့်ကြည့်သူတွေနဲ့ ပြည်သူတွေလက်ထဲမှာ အကြမ်းဖျင်း ထွက်ပေါ်လာတဲ့ အနိုင်အရှုံးစာရင်းကိုသာ ကိုင်စွဲထားနိုင်တာကို သတိပြုရပါမယ်။

(၂) ဒုတိယအချက်အနေနဲ့ ရွေးကောက်ပွဲမတိုင်ခင်က ကြားသိဖတ်ရှုရတဲ့ မဲပြားတွေ အပိုရိုက်ထားတယ် ဆိုတဲ့ သတင်းအချက်အလက်ကို သတိမမေ့ဖို့ လိုပါတယ်။ မြို့နယ်တိုင်းအတွက် အပိုရိုက်ထားတဲ့ မဲပြားတွေနဲ့ ကော်မရှင်က မျက်လှည့်ပြနိုင်တဲ့ အနေအထားရှိပါတယ်။ ဘယ်လိုမျက်လှည့်ပြနိုင်တဲ့ အနေအထားရှိတာလဲဆိုတော့ ရေတွက်ပြီးသား NLD ရထားတဲ့ ခိုင်လုံမဲတွေနေရာမှာ အပိုရိုက်ထားတဲ့ မဲပြားတွေနဲ့ လုပ်ထားတဲ့ NLD ပယ်မဲတွေကို လိုသလောက် လဲလှယ်ရောမွှေပြီး မီဒီယာတွေ၊ လေ့လာစောင့်ကြည့်သူတွေရှေ့မှောက်မှာ ဒုတိယအကြိမ် ပြန်ပြီး မဲရေတွက်ပြမယ့် မျက်လှည့်ပြကွက်ဖြစ်ပါတယ်။

ဒီကနေ့ နိုဝင်ဘာ ၉ ရက် ညနေ ၃ နာရီမှာ ဖွင့်လှစ်မယ်ဆိုတဲ့ ရွေးကောက်ပွဲရလဒ်တွေ ကြေညာမယ့် မီဒီယာစင်တာကြီးမှာ မကြာမီရက်တွေအတွင်း မီဒီယာတွေနဲ့ လေ့လာစောင့်ကြည့်လိုသူတွေကို နေ့စဉ်ရက်ဆက် ဖိတ်ကြားပြီး ရွေးကောက်ပွဲကော်မရှင်ရဲ့ အစီအစဉ်အရဖြစ်စေ၊ အရှုံးစာရင်း ကြိုသိထားတဲ့ ကြံ့ခိုင်ရေးနဲ့ အခြားပါတီကိုယ်စားလှယ်တွေက ကွန်ပလိန့်တက်လို့ဆိုတဲ့ အကြောင်းပြချက်နဲ့ဖြစ်စေ ဒုတိယအကြိမ် စိမ်ပြေနပြေ မဲပြန်ရေတွက်ပြပြီး ပြည်သူလူထုနဲ့ နိုင်ငံတကာကို မျက်လှည့်ပြနိုင်တဲ့အနေအထား ရှိကောင်းရှိနိုင်တယ်လို့ ထင်မြင်မိကြောင်း ကျနော် စဉ်းစားမိတဲ့အချက်ကို စေတနာရှေ့ထား တင်ပြလိုက်ရပါတယ်။ ဖြစ်နိုင်မဖြစ်နိုင် ၀ိုင်းဝန်းစဉ်းစားကြည့်ကြပါကုန် …။

အားလုံးသို့ လေးစားစွာဖြင့် …
ဒေါက်တာလွဏ်းဆွေ
၉ နိုဝင်ဘာ ၂၀၁၅

1 comment:

ko 9 said...

လားရှိုး :(