Thursday, July 3, 2014

သတင်းမီဒီယာတွေကို မေးမြန်း စစ်ဆေးမှု HRW ဝေဖန်

RFA - 2014-07-01
မြန်မာနိုင်ငံရဲ့ သတင်းမီဒီယာ လွတ်လပ် ခွင့် နောက်ကြောင်းပြန် သွားနေ တယ်လို့ အမေရိကန် ပြည်ထောင်စု နယူးယောက်မြို့အခြေစိုက် လူ့အခွင့်ရေး စောင့်ကြည့်လေ့လာရေးအဖွဲ့ HRW က ဝေဖန်လိုက်ပါတယ်။

မြန်မာသတင်းမီဒီယာနဲ့ စာနယ်ဇင်းတိုက်တွေက သတင်းထောက်နဲ့ အယ်ဒီတာတွေကို သတင်းတပ်ဖွဲ့ က ပန်းဆိုးတန်းလမ်းရုံးမှာခေါ်ယူပြီး ရသုံးငွေစာရင်း စစ်ဆေးနေတာတွေဟာ အရင်စစ်အစိုးရခေတ်က နည်းဗျူဟာအဟောင်းတွေကို သုံးပြီး ခြိမ်းခြောက်နေ တာဖြစ်ကြောင်း၊ အပေါ်ယံ အကြောင်းပြချက် က ငွေကြေးခဝါချမှုတွေ ကို ဖော်ထုတ်အရေးယူဖို့ ဆိုပေမယ့် သိသာထင်ရှားနေတာက သတင်းမီဒီယာတွေ ကို မသိမသာဖိအားပေးပြီး သတင်းအလုပ်အပေါ် ယုံကြည်မှုလျော့လာစေ ဖို့သာဖြစ်ကြောင်း HRW ရဲ့ အင်တာနက်စာမျက်နှာမှာ မနေ့ကနေ့စွဲနဲ့ ရေးသားထားပါတယ်။

ပြီးခဲ့တဲ့ လအနည်းငယ်ကလည်း သတင်းထောက်တွေကို စွဲချက်အမျိုးမျိုးနဲ့ ဖမ်းဆီးအရေးယူခဲ့တာတွေ ရှိခဲ့ကြောင်း၊ ဖန်တီးထားတဲ့ စွဲချက်တွေဖြစ်တဲ့ ပိုင်နက်ကျူးလွန်မှု၊ တာဝန် ဝတ္တရားနှောက်ယှက်မှုတွေနဲ့ ဒီဗွီဘီသတင်းထောက် ကိုဇော်ဖေကို ထောင်ဒဏ် ၁ နှစ်အပြစ်ဒဏ်ချခဲ့ကြောင်း HRW မြန်မာ နိုင်ငံဆိုင်ရာ ပြောခွင့်ရသူက ပြောပါတယ်။

သတင်းမီဒီယာတွေကို မေးမြန်းမှု စာနယ်ဇင်းကောင်စီ လက်မှတ်ကောက်ယူ
RFA - 2014-07-01

သတင်းဂျာနယ်တိုက်တွေက တာဝန်ရှိသူတွေ ကို မြန်မာနိုင်ငံ ရဲသတင်းအထူးတပ်ဖွဲ့က ခေါ် ယူမေးမြန်းနေတာနဲ့ ပတ်သက်ပြီး လွှတ်တော် ကိုယ်စားလှယ်တွေဘက်က ကူညီပေးဖို့ မြန်မာနိုင်ငံ စာနယ်ဇင်းကောင်စီ (ယာယီ)က ဒီနေ့ လက်မှတ်တွေ စတင်ကောက်ခံနေပါတယ်။

စာနယ်ဇင်းကောင်စီအနေနဲ့ လက်မှတ်တွေ စုဆောင်းကောက်ယူပြီး လွှတ်တော်ကို တင်ပြခြင်း အားဖြင့် ပြည်ထဲရေးဝန်ကြီးဌာနကို မေးခွန်းမေးမြန်း နိုင်တယ်လို့ မြန်မာနိုင်ငံစာနယ်ဇင်းကောင်စီ (ယာယီ) ရဲ့ အဖွဲ့ဝင်တစ်ဦးဖြစ်သူ ဦးဇော်သက်ထွေး က ပြောပါတယ်။

"အဓိကအားဖြင့်တော့ မီဒီယာသမားတွေကို ဒီလိုလုပ်ခြင်းဟာ သတင်းလွတ်လပ်ခွင့်ကို ထိပါးတယ်လို့ ယူဆတဲ့အတွက် စာနယ်ဇင်းကောင်စီ က ဦးဆောင်ပြီးလုပ်တာပါ၊ နိုင်ငံသားတွေရဲ့ အခွင့်အရေးတချို့ဟာ ဆုံးရှုံးနေတယ်၊ ဒါကြောင့် ဥပဒေအရ ပြန် လည်ပြီး စစ်ဆေးပေးဖို့အတွက် ရည်ရွယ်ပြီးတော့ လက်မှတ်ရေးထိုးပြီးတော့တင်ပြမှာ၊ ဒီလိုတင်ပြမှ လွှတ်တော် က ပြည်ထဲရေးဝန်ကြီးဌာန တာဝန်ရှိသူတွေကို ခေါ်ယူပြီးတော့မှ ဒါတွေဘယ်လိုဖြစ်တာလဲဆိုပြီးတော့ ဒီလို လက်မှတ်ရေးထိုးပြီးတော့ လွှတ်တော်ကိုရောက်နေတဲ့စာတွေရှိတယ်၊ ဒါကြောင့် ဘယ်လိုဖြစ်တာလဲလို့ မေးမြန်း နိုင်အောင်လုပ်တာ၊ မီဒီယာတွေရဲ့ လက်မှတ်တွေနဲ့ဆို ပိုအားကောင်းတာပေါ့"

ပြီးခဲ့တဲ့ ဇွန်လကုန်လောက်က ပြည်ထဲရေးဝန်ကြီးဌာန ရဲသတင်းအထူးတပ်ဖွဲ့က သတင်းဂျာနယ်တိုက်တွေရဲ့ အရှုံးအမြတ်နဲ့ ၀န်ထမ်းအင်အားစတာတွေကို ခေါ်ယူမေးမြန်းခဲ့တယ်လို့ သိရပါတယ်။

အဲ့ဒီလိုစစ်ဆေးတာဟာ သတင်းလွတ်လပ်ခွင့်ကို ထိပါးစေတာကြောင့် မြန်မာနိုင်ငံ စာနယ်ဇင်းကောင်စီ (ယာယီ) က ကန့်ကွက်ကြောင်း သဘောထားကြေညာချက် ထုတ်ပြန်ခဲ့ပါတယ်။

အဲဒီကြေညာချက်ထဲမှာ ရဲသတင်းအထူးတပ်ဖွဲ့က စစ်ဆေးမေးမြန်းခဲ့တာတွေကို အများပြည်သူသိရှိနိုင်အောင် ထုတ်ပြန်ကြေညာပေးဖို့ တောင်းဆိုထားသလို၊ သတင်းမီဒီယာတွေကို ခေါ်ယူစစ်ဆေးမယ်ဆိုရင် မြန်မာနိုင်ငံ စာနယ်ဇင်းကောင်စီ (ယာယီ) ကို တရားဝင် အကြောင်းကြားသင့်တယ်လို့ ဖော်ပြထားပါတယ်။

လက်မှတ်တွေကို ဒီနေ့ကစပြီးလာမယ့် ဇူလိုင်လ ၁၀ ရက်နေ့အထိ ကောက်ယူသွားမယ်လို့ သိရပါတယ်။

ဆက်စပ်သတင်း
- SB က သတင်းဌာနများကို ခေါ်ယူမေးမြန်းမှုအပေါ် ကန့်ကွက်လက်မှတ်များ စာနယ်ဇင်းကောင်စီ ကောက်ခံမည် click

No comments: